കൊച്ചി: എടികെയ്‌ക്കെതിരായ മത്സരത്തിൽ കേരള ബ്ലാസ്റ്റേഴ്സിന് വമ്പൻ തോൽവി. രണ്ടിനെതിരെ അഞ്ച് ഗോളിനാണ് എടികെയുടെ വിജയം. എടികെക്കായി ഓസ്ട്രേലിയൻ താരം ദിമിത്രി പെട്രാറ്റോസ് ഹാട്രിക്ക് നേടിയപ്പോൾ ജോണി കൗക്കോയും ലെനി റോഡ്രിഗസും ഗോൾ പട്ടിക തികച്ചു. സ്‌കോർ 5-2. മത്സരത്തിൻ്റെ ആറാം മിനുറ്റിൽ യുക്രൈനിയൻ മിസേൽ ഇവാൻ കല്യൂഷ്‌നിയിലൂടെ ബാസ്റ്റേഴ്‌സ് ആദ്യം മുന്നിലെത്തി.
ആദ്യ പകുതിയുടെ ആരംഭം മുതൽ തന്നെ ഗോൾ നേടാൻ അവസരങ്ങൾ ബ്ലാസ്റ്റേഴ്സിന് ലഭിച്ചിരുന്നുവെങ്കിലും മുതെലെടുക്കാനായില്ല. എന്നാൽ ആദ്യ മിനുറ്റിൽ പ്രസിംഗ് ഗെയിം തുടരാൻ ബ്ലാസ്റ്റേഴ്സിന് സാധിച്ചില്ല. ഇതോടെ എടികെ ആക്രമണം ആരംഭിച്ചു. തുടർച്ചയായി ആക്രമണങ്ങൾക്കൊടുവിൽ 26-ാം മിനുറ്റിൽ എടികെയുടെ ദിമിത്രി പെട്രാറ്റോസ് മഞ്ഞപ്പടയുടെ വലകുലുക്കി. സ്‌കോർ സമനിലയായതിന് ശേഷം സ്ഥിരത കൈവരിക്കാൻ ബ്ലാസ്റ്റേഴ്‌സ് ശ്രമിച്ചെങ്കിലും പരാജയപ്പെട്ടു.
കേരളത്തിന് പ്രഹരം ഏൽപ്പിച്ചു കൊണ്ട് ജോണി കൗക്കോ 38ാം മിനുറ്റിൽ എടികെക്കായി രണ്ടാം ഗോൾ നേടി. രണ്ടാം പകുതിയിൽ ഗോൾ മടക്കാനുളള ബ്ലാസ്റ്റേഴ്‌സിൻ്റെ പരിശ്രങ്ങളെ തകർത്തുകൊണ്ട് 62-ാം മിനുറ്റിൽ ദിമിത്രി പെട്രാറ്റോസ് തൻ്റെ രണ്ടാം ഗോൾ നേടി എടികെയുടെ ലീഡ് ഉയർത്തി. ഗോൾ നേടാനുളള തുടർ ശ്രമങ്ങൾക്കൊടുവിൽ 81-ാം മിനുറ്റിൽ മലയാളി താരം രാഹുൽ കെ.പിയുടെ തകർപ്പൻ ഗോളിൽ കേരളം ലീഡ് കുറച്ചു. തിരിച്ചടിക്കാൻ വീണ്ടും അക്രമിച്ച് കളിച്ച് എടികെയ്ക്കായി ലെന്നി റോഡ്രിഗസ് 88-ാം മിനുറ്റിൽ മിന്നും ഗോളിലൂടെ സ്‌കോർ നാലാക്കി ഉയർത്തി. ദിമിത്രി പെട്രാറ്റോസിൻ്റെ അസിസ്റ്റിലായിരുന്നു ലെന്നിയുടെ ഗോൾ. 92-ാം മിനുറ്റിൽ വലകുലുക്കി ദിമിത്രി പെട്രാറ്റോസ് തൻ്റെ മൂന്നാമത്തെയും എടികെയുടെ അഞ്ചാം ഗോളും സ്‌കോർ ചെയ്തു.
