കൊച്ചി: കേരള ബ്ലാസ്‌റ്റേഴ്‌സ് എഫ്‌സി, ഹീറോ ഇന്ത്യൻ സൂപ്പർ ലീഗ് 2022-23 സീസണിനുള്ള ഔദ്യോഗിക ടീമിനെ പ്രഖ്യാപിച്ചു. ജെസെൽ കർണെയ്‌റോ ആണ് ക്യാപ്റ്റൻ. പരിശീലകൻ വാൻവുകോമനോവിച്ച്. കഴിഞ്ഞ സീസണിൽ കളിച്ച 16 പേരെ നിലനിർത്തി. 10 പുതുമുഖങ്ങൾ. കെ പി രാഹുൽ, സഹൽ അബ്ദുൾ സമദ്, ശ്രീക്കുട്ടൻ, സച്ചിൻ സുരേഷ്, നിഹാൽ സുധീഷ്, ബിജോയ് വർഗീസ്, വിബിൻമോഹനൻ എന്നിവരാണ് മലയാളി താരങ്ങൾ. വെള്ളിയാഴ്ച കൊച്ചി കലൂർ ജവഹർലാൽ നെഹ്‌റു അന്താരാഷ്ട്ര സ്‌റ്റേഡിയത്തിൽ ഈസ്റ്റ് ബംഗാൾ എഫ്‌സിക്കെതിരെയാണ് ബ്ലാസ്റ്റേഴ്സിൻ്റെ ആദ്യമത്സരം. സീസണിലെ ഉദ്ഘാടന മത്സരവുമാണിത്. കഴിഞ്ഞ സീസണിൽ ഫൈനലിൽ ഹൈദരാബാദിനോട് നഷ്ടപ്പെട്ട കിരീടം വീണ്ടെടുക്കുകയാണ് കേരളം ലക്ഷ്യമിടുന്നത്.
സച്ചിൻ സുരേഷ്, മുഹീറ്റ് ഷബിർ, പ്രഭ്സുഖൻ സിംഗ് ഗിൽ, കരൺജിത് സിംഗ് എന്നിവരാകും ഗോൾ വലകാക്കുക. സന്ദീപ് സിംഗ്, ബിജോയ് വർഗീസ്, നിഷു കുമാർ, വിക്ടർ മോംഗിൽ, മാർക്കോ ലെസ്‌കോവിച്ച്, ജെസൽ കാർനെറോ (ക്യാപ്റ്റൻ), ഹർമൻജോത് സിംഗ് ഖബ്ര, ഹോർമിപാം റൂയിവ തുടങ്ങിയവർ പ്രതിരോധ നിരയിൽ അണിനിരക്കും. സഹൽ അബ്ദുൽ സമദ്, പ്യൂട്ടിയ, ആയുഷ് അധികാരി, ഗിവ്സൺ സിംഗ്, അഡ്രിയാൻ ലൂണ, ജീക്സൺ സിംഗ്, സൗരവ് മണ്ഡൽ, നിഹാൽ സുധീഷ്, വിബിൻ മോഹനൻ, ഇവാൻ കലുഷ്നി, ബ്രൈസ് മിറാൻഡയെ പോലെ മികച്ച താരങ്ങൽ അടങ്ങുന്നതാണ് കൊമ്പൻമാരുടെ മധ്യനിര. ഡിമിട്രിയോസ് ഡയമന്റകോസ്, ബിദ്യഷാഗർ സിംഗ്, ശ്രീക്കുട്ടൻ എംഎസ്, അപ്പോസ്തോലോസ് ജിയാനോ, രാഹുൽ കെ പി എന്നിവരാകും മുന്നേറ്റ നിരയിൽ ചുക്കാൻ പിടിക്കുക.
