ന്യൂസിലൻഡിനെതിരായിട്ടുള്ള ആദ്യ ഏകദിനത്തിൽ 11 ഓവർ ബാക്കിനിൽക്കെ വെസ്റ്റ് ഇൻഡീസിന് വിജയം.79 റൺസ് നേടിയ ഷമർ ബ്രൂക്സ് ക്യാപ്റ്റൻ നിക്കോളാസ് പൂരനുമായി ചേർന്ന് 75 റൺസിൻ്റെ കൂട്ടുകെട്ട് പടുത്തുയർത്തിയതാണ് വെസ്റ്റ് ഇൻഡീസിനെ ഒന്നാം റാങ്കിലുള്ള ന്യൂസിലൻഡിനെതിരെ അഞ്ച് വിക്കറ്റ് വിജയത്തിലേക്ക് നയിച്ചത്. 58 പന്തിൽ നിന്ന് തൻ്റെ നാലാം ഏകദിന അർധസെഞ്ചുറിയിലെത്തിയ ബ്രൂക്സ് വെസ്റ്റ് ഇൻഡീസിൻ്റെ വിജയത്തിന് വേഗംകുട്ടിയപ്പോൾ ന്യൂസിലൻഡ് ഉയർത്തിയ 190 റൺസ് വിജയലക്ഷ്യം വെസ്റ്റ് ഇൻഡീസ് മറികടന്നു. മഴ ഇടക്ക് വില്ലനായെങ്കിലും വെസ്റ്റ് ഇൻഡീസിൻ്റെ കുതിപ്പിന് തടയിടാനായില്ല. 2020 മാർച്ചിന് ശേഷം ഇതാദ്യമായാണ് ന്യൂസിലൻഡ് 50 ഓവർ മത്സരത്തിൽ തോൽക്കുന്നത്. ടോസ് നേടി ബൗളിംഗ് തിരഞ്ഞെടുത്ത വെസ്റ്റ് ഇൻഡീസിനുവേണ്ടി അക്കീൽ ഹൊസൈൻ 3-28, അൽസാരി ജോസഫ് 3-36 എന്നിവർ മികച്ച പ്രകടനം നടത്തി. മൂന്ന് ഏകദിനങ്ങൾ ഉള്ള പരമ്പരയിലെ രണ്ടാം മത്സരം വെള്ളിയാഴ്ച ഇതേ വേദിയിൽ നടക്കും.
