പ്രധാനമന്ത്രി നരേന്ദ്ര മോദിയെ പുകഴ്ത്തി കോൺഗ്രസ് നേതാവ് ശശി തരൂർ എം പി. നരേന്ദ്ര മോദി വിജയിച്ച ബ്രാൻഡ് എന്നാണ് ശശി തരൂർ വിശേഷിപ്പിച്ചത്. ബിജെപി അനുഭാവിയും ചാനൽ ചർച്ചകളിലെ സംഘപരിവാർ അനുകൂല രാഷ്ട്രീയ നിരീക്ഷകനുമായ പി കെ ഡി നമ്പ്യാരുടെ പുസ്തക പ്രകാശന ചടങ്ങിലാണ് ശശി തരൂർ എം പി പ്രധാനമന്ത്രിയെ പുകഴ്ത്തിയത്. സംഘപരിവാർ അനുകൂല പുസ്തക പ്രസാദക സ്ഥാപനമായ ഇൻഡസ് സ്ക്രാൾസാണ് പരിപാടി സംഘടിപ്പിച്ചത്.
യു ടൂ കാൻ ബി എ ബ്രാൻഡ് എന്ന പുസ്തകത്തിൻ്റെ പ്രകാശന ചടങ്ങിലായിരുന്നു പ്രശംസ. ‘നരേന്ദ്ര മോദി വിജയിച്ച ബ്രാൻഡ് ആണ്. മോദി അവസരങ്ങൾ മുതലെടുത്ത് നെഗറ്റീവിനെയും വിമർശനങ്ങളെയും അവസരമാക്കി മാറ്റി. നെഗറ്റീവ് ഇമേജ് മറികടന്ന് ജനങ്ങളെ സ്വാധിനിക്കാൻ കഴിഞ്ഞു’, തരൂർ പറഞ്ഞു.
2014 നു മുൻപ് നരേന്ദ്ര മോദിക്കെതിരെ നിരവധി ആരോപണങ്ങൾ നിലനിന്നിരുന്നു. എന്നാൽ 2014 ന് ശേഷം പ്രധാനമന്ത്രിക്കെതിരെ ആരോപണങ്ങൾ ഇല്ല എന്ന് പറഞ്ഞ തരൂർ കോൺഗ്രസിലെ കുടുംബ വാഴ്ച്ചയെയും എതിർത്തു.
