പാലക്കാട്ടെ സിപിഎം നേതാവ് ഷാജഹാനെ കൊലപ്പെടുത്തിയ കേസില്‍ മുഴുവന്‍ പ്രതികളും കസ്റ്റഡിയിലായി. കേസില്‍ പ്രതിചേര്‍ക്കപ്പെട്ട 8 പ്രതികളെയും പൊലീസ് പിടികൂടി. ആര്‍ എസ് എസ് പ്രവര്‍ത്തകരായ ശബരീഷ്. അനീഷ്.നവീന്‍, ശിവരാജന്‍, സിദ്ധാര്‍ത്ഥന്‍, സുജീഷ്, സജീഷ്, വിഷ്ണു എന്നിവരാണ് പിടിയിലായത്. ഇവരെ പൊലീസ് ചോദ്യം ചെയ്ത് വരികയാണ്. ഇന്നലെ രാത്രി തന്നെ രണ്ട് പ്രതികളെ കസ്റ്റഡിയിലെടുത്തിരുന്നു. ഇന്ന് ബാക്കി ആറു പ്രതികളെ കൂടി പിടികൂടുകയായിരുന്നു. കൊലപാതകത്തിന് ശേഷം മൂന്ന് സംഘങ്ങളായാണ് പ്രതികള്‍ ഒളിവില്‍ കഴിഞ്ഞതെന്നാണ് വിവരം. പ്രതികളുടെ അറസ്റ്റ് നാളെ രേഖപ്പെടുത്തും. കൊലപാതകം നടത്തിയ 14 ന് വൈകുന്നേരം ചന്ദ്രനഗര്‍ ചാണക്യ ഹോട്ടലില്‍ പ്രതികള്‍ ഒത്തുചേര്‍ന്നതായും പൊലീസ് അന്വേഷണത്തില്‍ കണ്ടെത്തിയിട്ടുണ്ട്. ഇത് തെളിയിക്കുന്ന ഹോട്ടല്‍ ദൃശ്യങ്ങള്‍ പൊലീസിന് ലഭിച്ചു.
ഞായറാഴ്ച രാത്രിയാണ് സിപിഎം മരുത റോഡ് ലോക്കല്‍ കമ്മിറ്റി അംഗം ഷാജഹാനെ കൊട്ടേക്കാട് കുന്നംക്കാട് വെച്ച് ആര്‍ എസ് എസ് സംഘം വെട്ടിക്കൊലപ്പെടുത്തിയത്.
