മോദിയുടെ പുസ്തകം മാറ്റിയത് പാകിസ്ഥാൻ അനുകൂല സമീപനം; കാലിക്കറ്റ് സർവ്വകലാശാലയ്‌ക്കെതിരെ കെ സുരേന്ദ്രൻ

കാലിക്കറ്റ് സർവ്വകലാശാലയ്‌ക്കെതിരെ വെല്ലുവിളിയുമായി ബിജെപി സംസ്ഥാന അധ്യക്ഷൻ കെ സുരേന്ദ്രൻ. പ്രധാനമന്ത്രി നരേന്ദ്രമോദിയെ കുറിച്ചുള്ള “മോദി @20 ഡ്രീംസ് മീറ്റ് ഡെലിവെറി” എന്ന പുസ്തകം കാലിക്കറ്റ് യൂണിവേഴ്സിറ്റിയുടെ ലൈബ്രറിയിലെ ഡിസ്പ്ലേ ബോക്സിൽ നിന്നും നീക്കിയത് പാകിസ്താൻ അനുകൂല സമീപനത്തിന്റെ ഭാഗമാണെന്ന് കെ സുരേന്ദ്രൻ പറഞ്ഞു. നരേന്ദ്രമോദിയെ കുറിച്ച് രാജ്യത്തെ 20 പ്രമുഖ വ്യക്തിത്വങ്ങൾ എഴുതിയ പുസ്തകമാണ് മോദി @20. ദേശവിരുദ്ധ ശക്തികളുടെ സമ്മർദ്ദത്തിന് വഴങ്ങി യൂണിവേഴ്സിറ്റി അധികൃതർ രാജ്യത്തിന്റെ മഹത്തായ ജനാധിപത്യത്തെയും ഭരണഘടനയെയും അപമാനിക്കുകയാണെന്നും അദ്ദേഹം പ്രസ്താവനയിൽ പറഞ്ഞു. പുസ്തകം നീക്കിയതിനെ തുടർന്ന് സംസ്ഥാനത്തെ എല്ലാ കാമ്പസുകളിലും പുസ്തകോത്സവവും മറ്റ് പ്രതിഷേധപരിപാടികളും നടത്തുമെന്നും ആഹ്വാനം ചെയ്തിട്ടുണ്ട്.