ന്യൂയോർക്: യുഎസ് ഓപ്പൺ നാലാം റൗണ്ടിൽ റാഫേൽ നദാലിനെതിരെ അട്ടിമറി ജയവുമായി അമേരിക്കയുടെ ഫ്രാൻസിസ് ടിയാഫോ. രണ്ടാം സീഡായ സ്പാനിഷ് ഇതിഹാസത്തെ ഒന്നിനെതിരെ മൂന്ന് സെറ്റുകൾക്ക് തകർത്ത് 22-ാം സീഡായ ടിയാഫോ ക്വാർട്ടറിലേക്ക് മുന്നേറി. ബുധനാഴ്ച നടക്കുന്ന ക്വാർട്ടർ ഫൈനലിൽ റഷ്യയുടെ ആൻഡ്രി റൂബ്ലെവിനാണ് ടിയാഫോയുടെ എതിരാളി. മൂന്ന് മണിക്കൂറും 34 മിനിറ്റും നീണ്ട പോരാട്ടത്തിനൊടുവിൽ 6-4, 4-6, 6-4, 6-3 എന്ന സ്‌കോറിനാണ് ടിയാഫോ നദാലിനെ തകർത്ത് ക്വാർട്ടർ ഫൈനലിലെത്തിയത്.
മറ്റൊരു മത്സരത്തിൽ ലോക ഒന്നാം നമ്പർ പുരുഷ താരമായ റഷ്യയുടെ ഡാനിൽ മെദ്‌വദേവ് പ്രീ ക്വാർട്ടറിലാണ് പുറത്തായത്. നാല് സെറ്റിലേക്ക് നീണ്ട പോരാട്ടത്തിൽ ആസ്‌ത്രേലിയയുടെ നിക് കിർഗിയോസിനോട് മേദ്‌വദേവ് അടിയറവ് പറയുകയായിരുന്നു. ഇതോടെ കിരീടം നിലനിർത്താനാകാതെ മെദ്‌വദേവ് നാട്ടിലേക്ക് മടങ്ങി. കിർഗിയോസ് ക്വാർട്ടറിലേക്കും കടന്നുകയറി. സ്‌കോർ 7-6, 3-6, 6-3, 6-2.
