കൊച്ചി: തുടർ തോൽവികൾക്കൊടുവിൽ ഐഎസ്എല്ലിൽ തിരിച്ചു വരവിനൊരുങ്ങി കേരളാ ബ്ലാസ്റ്റേഴ്സ് ഇന്ന് വീണ്ടുമിറങ്ങും. മുൻചാംപ്യന്മാരായ മുംബൈ സിറ്റിയാണ് എതിരാളികൾ. രാത്രി 7.30നു കലൂർ സ്റ്റേഡിയത്തിലാണ് മത്സരം. തുടർച്ചയായ രണ്ട് തോൽവികൾ ഏറ്റുവാങ്ങിയതിൻ്റെ ക്ഷീണത്തിലാണ് ഇവാൻ വുകോമനോവിച്ചും സംഘവും. കൊച്ചിയിൽ എടികെയും എവേമത്സരത്തിൽ ഒഡിഷയോടും വീണു. ഇന്ന് സ്വന്തം കാണികൾക്ക് മുന്നിൽ തിരിച്ചുവരവിൽ കുറഞ്ഞതൊന്നും ലക്ഷ്യമിടുന്നില്ലെന്ന് കോച്ച് ഇവാൻ വുകോമനോവിച്ച്.
സീസണിൽ ഇതുവരെ തോൽവിയറിയാതെയാണ് മുംബൈയുടെ മുന്നേറ്റം. മൂന്ന് കളിയിൽ ആറ് ഗോളടിച്ചപ്പോൾ എട്ടെണ്ണം വഴങ്ങി. മൂന്ന് ഗോളടിച്ച ഇവാൻ കലിയുഷ്നിയിലാണ് ബ്ലാസ്റ്റേഴ്സിൻ്റെ പ്രതീക്ഷകൾ. ഡാനിയേൽ ചുക്വുവാണ് മുംബൈയുടെ പ്രധാന താരം. ഒരു ജയവും രണ്ട് സമനിലയുമായി ലീഗിൽ നാലാമതാണ് മുംബൈ. ഒമ്പതാമതാണ് ബ്ലാസ്റ്റേഴ്സ്. പ്രതിരോധത്തിലെ പാളിച്ച പരിഹരിക്കുകയാകും ബ്ലാസ്റ്റേഴ്സിന് മുന്നിലെ പ്രധാനവെല്ലുവിളി.
