വിളപ്പിൽശാലയിൽ സിപിഎം നേതാവിന് നേരെ ആർഎസ്എസ് ആക്രമണം. സിപിഎം നെയ്യാർഡാം ലോക്കൽ കമ്മിറ്റി സെക്രട്ടറിയും കാട്ടാക്കട ഏരിയാ കമ്മിറ്റി അംഗവുമായ കെ സുനിൽ കുമാറാണ് ആക്രമിക്കപ്പെട്ടത്. വിളപ്പിൽശാല കുന്നുംപുറത്തിനടുത്ത് വച്ച് ബൈക്കിൽ സഞ്ചരിക്കുമ്പോൾ പിന്തുടർന്ന് എത്തിയ മൂന്നംഗ ആർഎസ്എസ് സംഘം ഇരുമ്പ് വടികൊണ്ട് ആക്രമിക്കുകയായിരുന്നു.
ആർഎസ്എസിനെ അറിയാമോടാ.. ആർഎസ്എസിനോട് കളിക്കുമോടാ എന്ന് പറഞ്ഞ ശേഷമാണ് മൂന്നംഗം സംഘം സുനിൽ കുമാറിനെ ആക്രമിച്ചത്. ബുധനാഴ്ച രാത്രി എട്ടോടെയാണ് സംഭവം. ആക്രമണത്തിൽ സാരമായി പരുക്കേറ്റ സുനിൽ കുമാറിനെ മെഡിക്കൽ കോളേജിൽ പ്രവേശിപ്പിച്ചു.
ബഹളംകേട്ട് നാട്ടുകാർ കൂടിയതോടെ അക്രമികൾ ബൈക്കിൽ രക്ഷപ്പെട്ടു. കഴിഞ്ഞ ദിവസങ്ങളിൽ ബിജെപി, ആർഎസ്എസ് നേതൃത്വത്തിൽ സിപിഎമ്മിനും ഡിവൈഎഫ്ഐയ്‌ക്കും എതിരെ കൊലവിളി മുഴക്കിയിരുന്നു. കാട്ടാക്കട ഏരിയാ സെക്രട്ടറിയുടെ വീടിന് നേരെയും കഴിഞ്ഞ ദിവസം ആർഎസ്എസ് ആക്രമണം നടന്നിരുന്നു. പിന്നാലെയാണ് സുനിൽ കുമാർ ആക്രമിക്കപ്പെട്ടത്.
