ബ്രിസ്‌ബേൻ: ഇന്ത്യയും ന്യൂസീലൻഡും തമ്മിൽ ഇന്ന് നടക്കാനിരുന്ന സന്നാഹമത്സരം ഉപേക്ഷിച്ചു. ബ്രിസ്ബണിൽ കനത്ത മഴ ആയതിനെ തുടർന്നാണ് ടോസ് പോലും ഇടാതെ മത്സരം ഉപേക്ഷിച്ചത്. ഇന്ത്യൻസമയം ഉച്ചയ്ക്ക് ഒരു മണിക്കായിരുന്നു ടോസ് വീഴേണ്ടിയിരുന്നത്.
ഇതേ സ്റ്റേഡിയത്തിൽ രാവിലെ നടന്ന അഫ്‌ഗാനിസ്ഥാൻ-പാകിസ്ഥാൻ വാംഅപ് മത്സരം മഴമൂലം പാതിവഴിയിൽ ഉപേക്ഷിച്ചിരുന്നു. അഫ്‌ഗാനിസ്ഥാൻ മുന്നോട്ടുവെച്ച 155 റൺസ് വിജയലക്ഷ്യം പിന്തുടരവെ പാകിസ്ഥാൻ 2.2 ഓവറിൽ 19-0 എന്ന സ്കോറിൽ നിൽക്കേയാണ് മഴയെത്തിയത്. പിന്നീട് കളി പുനരാരംഭിക്കാനായില്ല. ഇന്നത്തെ മത്സരം ഉപേക്ഷിച്ചതോടെ ലോകകപ്പിൽ അഫ്‌ഗാനിസ്ഥാൻ്റെയും പാകിസ്ഥാൻ്റെയും വാംഅപ് മത്സരങ്ങൾ അവസാനിച്ചു.
