കൊച്ചി: ഇന്ത്യൻ സൂപ്പർ ലീഗ് ഒമ്പതാം സീസണിൻ്റെ ആദ്യ മത്സരത്തിനുള്ള ടിക്കറ്റ് വില്‍പ്പന ആരംഭിച്ചു. ആദ്യ മത്സരത്തിൽ കേരളാ ബ്ലാസ്റ്റേഴ്സ് ഈസ്റ്റ് ബംഗാളിനെയാണ് നേരിടുന്നത്. കലൂര്‍ ജവഹര്‍ലാല്‍ നെഹ്‌റു സ്റ്റേഡിയത്തിൽ ഒക്ടോബര്‍ ഏഴിനാണ് മത്സരം. രണ്ട് വർഷത്തിന് ശേഷമാണ് കേരള ബ്ലാസ്റ്റേഴ്സ് ഹോം ഗ്രൗണ്ടിൽ കളിക്കാനിറങ്ങുന്നത്.
പേടിഎമ്മിൻ്റെയും പേടിഎം ഇന്‍സൈഡറുടേയും ഉടമകളായ വണ്‍97 കമ്മ്യൂണിക്കേഷന്‍സ് ലിമിറ്റഡാണ് ഇത്തവണയും കേരളാ ബ്ലാസ്റ്റേഴ്സിൻ്റെ ഔദ്യോഗിക ടിക്കറ്റ് പങ്കാളികള്‍. പേടിഎം വഴിയും Insider.in വെബ്‌സൈറ്റ് വഴിയും മൊബൈല്‍ ആപ്ലിക്കേഷന്‍ വഴിയും ടിക്കറ്റ് വാങ്ങാം. 299 രൂപയ്ക്കാണ് ഗാലറി ടിക്കറ്റ് ആരംഭിക്കുന്നത്. വിഐപി ടിക്കറ്റിന് 1999 രൂപയാണ്. നോര്‍ത്ത്- സൗത്ത് ഗാലറികള്‍ക്ക് 299 രൂപ, ഈസ്റ്റ്-വെസ്റ്റ് ഗാലറി 399 രൂപ, ബ്ലോക്ക് ബി, ഡി- 499 രൂപ, ബ്ലോക്ക് എ, സി, ഇ- 899 രൂപ എന്നിങ്ങനെയാണ് ടിക്കറ്റ് നിരക്ക്.
