കാനഡിലെ അടച്ചിട്ട സ്കൂളിൽ നിന്നും 215 കുട്ടികളുടെ മൃതദേഹാവശിഷ്ടങ്ങൾ കണ്ടെടുത്തു. സംഭവം ഹൃദയം തകർക്കുന്നതാണെന്ന് കാനഡ പ്രധാനമന്ത്രി ജസ്റ്റിൻ ട്രൂഡോ. 1978ൽ പൂട്ടിയ ബ്രിട്ടീഷ് കൊളംബിയയിലെ കാംലൂപ്സ് ഇന്ത്യൻ റെസിഡൻഷ്യൽ സ്കൂളിൽ നിന്നാണ് റഡാര്‍ സഹായത്തോടെ മൃതദേഹാവശിഷ്ടങ്ങള്‍ കണ്ടെത്തിയത്.
മൂന്ന് വയസ്സു മുതൽ പ്രായമുള്ള കുട്ടികളുടെ അസ്ഥികൂടങ്ങളാണ് സ്കൂളിൽ ഭൂമിയ്ക്കടിയിൽ നിന്ന് കണ്ടെത്തിയതെന്നാണ് അന്താരാഷ്ട്ര മാധ്യമങ്ങളുടെ റിപ്പോര്‍ട്ട്. കാനഡയിലെ തദ്ദേശീയ ഗോത്രവര്‍ഗത്തിൽപ്പെട്ട കുട്ടികള്‍ പഠിച്ചിരുന്ന സ്കൂളിലാണ് സംഭവം. ഈ കുട്ടികള്‍ മരണപ്പെട്ടിരിക്കാമെന്ന് തങ്ങള്‍ നേരത്തെ തന്നെ കരുതിയിരുന്നുവെന്നും ഇക്കാര്യങ്ങള്‍ ഇപ്പോള്‍ തെളിഞ്ഞെന്നും ഗോത്രവിഭാഗമായ കാംലൂപ്സ് ടെ സെസെപ്മിക് നേഷൻ പ്രസ്താവനയിൽ അറിയിച്ചു. പുതിയ കണ്ടെത്തലിൻ്റെ അടിസ്ഥാനത്തിൽ തങ്ങള്‍ക്ക് ഉത്തരങ്ങളെക്കാള്‍ ഏറെ ചോദ്യങ്ങള്‍ ഉള്ളതെന്നും ഗോത്രവിഭാഗത്തിൻ്റെ നേതാവായ റൊസേൻ സേസിമിര്‍ കൂട്ടിച്ചേര്‍ത്തു.
കാനഡയിൽ ഏറെ ചോദ്യം ചെയ്യപ്പെട്ടിരുന്ന റെസിഡൻഷ്യൽ സ്കൂള്‍ സംവിധാനം അനുസരിച്ച് പ്രവര്‍ത്തിച്ചിരുന്ന സ്കൂളിലാണ് ഗോത്രവിഭാഗത്തിൽപ്പെട്ട കുട്ടികളുടെ കൂട്ടമരണം റിപ്പോര്‍ട്ട് ചെയ്തത്. കുട്ടികള്‍ സ്കൂളിൽ തന്നെ താമസിച്ചു പഠിക്കണമെന്ന നിബന്ധന മൂലം മാതാപിതാക്കള്‍ക്കൊപ്പം കുട്ടികളെ തങ്ങാൻ അനുവദിച്ചിരുന്നില്ല. എന്നാൽ ഈ രീതി സാംസ്കാരികമായ നരഹത്യയാണെന്നും ഇത് അവസാനിപ്പിക്കണമെന്നും മുൻപ് തന്നെ ആവശ്യമുയര്‍ന്നിരുന്നു. ഇതിൻ്റെ അടിസ്ഥാനത്തിൽ 2008ൽ റസിഡൻഷ്യൽ സ്കൂള്‍ സംവിധാനം കാനഡ അവസാനിപ്പിച്ചിരുന്നു. കുട്ടികളുടെ അവകാശങ്ങള്‍ നിഷേധിക്കുന്ന ഈ സംവിധാനത്തിൻ്റെ പേരിൽ കനേഡിയൻ സര്‍ക്കാര്‍ മാപ്പ് പറയുകയും ചെയ്തിരുന്നു.
റെസിഡൻഷ്യൽ സ്കൂളുകളിൽ കുട്ടികൾ കൊടിയ പീഡനമാണ് നേരിട്ടിരുന്നതെന്നാണ് റിപ്പോര്‍ട്ട് സൂചിപ്പിക്കുന്നത്. രാജ്യത്തിൻ്റെ ചരിത്രത്തിൽ ഇതൊരു നാണക്കേടിൻ്റെ അധ്യായമാണെന്നും സംഭവം ഹൃദയഭേദകമാണെന്നും ജസ്റ്റിൻ ട്രൂഡോ ട്വീറ്റ് ചെയ്തു. ക്രിസ്തീയസഭകള്‍ നടത്തിയിരുന്ന ഈ റസിഡൻഷ്യൽ സ്കൂളുകളിൽ പഠിച്ചിരുന്ന ഒന്നര ലക്ഷത്തോളം കുട്ടികള്‍ കടുത്ത ശാരീരിക പീഡനത്തിനും ബലാത്സംഗത്തിനും ഇരയായിരുന്നുവെന്നും ഇവര്‍ക്ക് പോഷകാഹാരക്കുറവുണ്ടായിരുന്നതായും റിപ്പോര്‍ട്ടിൽ പറയുന്നു. 1840ൽ ആരംഭിച്ച ഈ സ്കൂളുകള്‍ 1990കളിൽ വരെ സാധാരണമായിരുന്നു. ഈ സ്കൂളുകളിലെ പഠനത്തിനിടെ ഇതുവരെ 4100ഓളം കുട്ടികള്‍ മരിച്ചതായും റിപ്പോര്‍ട്ടിൽ പറയുന്നു.
രാജ്യത്ത് ഒരുകാലത്ത് പ്രവര്‍ത്തിച്ചിരുന്ന ഏറ്റവും വലിയ റെസിഡൻഷ്യൽ സ്കൂളുകളിലാണ് കുട്ടികളുടെ മൃതദേഹങ്ങള്‍ കുഴിച്ചു മൂടിയ നിലയിൽ കണ്ടെത്തിയതെന്നാണ് വാര്‍ത്താ ഏജൻസിയായ റോയിട്ടേഴ്സിൻ്റെ റിപ്പോര്‍ട്ട്. മൊത്തം 215 കുട്ടികളുടെ മൃതദേഹങ്ങളാണ് ഇവിടെ കണ്ടെത്തിയത്. എന്നാൽ ഈ മരണങ്ങള്‍ ഒരിടത്തും രേഖപ്പെടുത്തിയിരുന്നില്ല.
