ഭുവനേശ്വർ: ഐഎസ്എലിൽ കേരള ബ്ലാസ്റ്റേഴ്സിന് ഇന്ന് ആദ്യ എവേ മത്സരം. ഭുവനേശ്വറിലെ കലിംഗ സ്റ്റേഡിയത്തിൽ നടക്കുന്ന മത്സരത്തിൽ ആതിഥേയരായ ഒഡീഷയാണ് ബ്ലാസ്റ്റേഴ്സിൻ്റെ എതിരാളികൾ. രാത്രി ഏഴരയ്‌ക്കാണ്‌ പോരാട്ടം. കൊച്ചി ജവഹർലാൽ നെഹ്റു സ്റ്റേഡിയത്തിൽ നടന്ന കഴിഞ്ഞ മത്സരത്തിൽ എടികെ മോഹൻ ബഗാനെതിരെ 2-5നു കീഴടങ്ങിയ ബ്ലാസ്റ്റേഴ്സിന് ഇന്ന് ജയിക്കേണ്ടത് അനിവാര്യമാണ്.
ഇരു ടീമുകൾക്കും രണ്ട് മത്സരങ്ങളിൽ നിന്ന് മൂന്ന് പോയിൻ്റുണ്ട്. ബ്ലാസ്റ്റേഴ്സ് നിരയിൽ ഇന്ന് മാറ്റങ്ങളുണ്ടായേക്കുമെന്നാണ് സൂചന. എടികെയ്ക്കെതിരെ കലിയുഷ്നിയെയും ദിമിത്രിയോസിനെയും ആക്രമണത്തിനു നിയോഗിച്ച ഇവാൻ ഇന്ന് ഇന്ത്യൻ ഫോർവേഡ് ബിദ്യാസാഗറെ ദിമിത്രിയോസിനു പകരം പരീക്ഷിച്ചേക്കും. അങ്ങനെയെങ്കിൽ, കഴിഞ്ഞ മത്സരത്തിൽ നിരാശപ്പെടുത്തിയ റുയിവ ഹോർമിപാമിനു പകരം വിക്ടർ മോംഗിൽ പ്രതിരോധ നിരയിൽ ഇറങ്ങും. രണ്ടുകളിയിൽ ഒന്നുവീതം ജയവും തോൽവിയുമാണ്‌ ബ്ലാസ്‌റ്റേഴ്‌സിനും ഒഡിഷയ്‌ക്കും. സ്വന്തംതട്ടകത്തിൽ ആദ്യകളിക്കാണ്‌ ഒഡിഷ ഇറങ്ങുന്നത്‌. ബ്രസീൽ മുന്നേറ്റക്കാരൻ ദ്യേഗോ മൗറീസിയോയാണ്‌ അവരുടെ കുന്തമുന. ഇരുടീമുകളും ആറുതവണ ഏറ്റുമുട്ടിയപ്പോൾ ബ്ലാസ്റ്റേഴ്സ് രണ്ടിൽ ജയിച്ചു. ഒഡിഷ ഒന്നിലും. മൂന്നെണ്ണം സമനിലയായി.
