ലഖ്‌നൗ: ഇന്ത്യ-ദക്ഷിണാഫ്രിക്ക ഏകദിന പരമ്പരയിലെ ആദ്യ മത്സരം ഇന്ന് നടക്കും. ഉച്ചയ്ക്ക് ഒരു മണിക്ക് ലഖ്നൗവിലാണ് മത്സരം. സ്റ്റാർ സ്പോർട്‌സ് നെറ്റ്‌വർക്കും ഡിസ്‌നി+ഹോട്‌സ്റ്റാറിലും മത്സരം തത്സമയം കാണാം. രോഹിത് ശർമ്മ സീനിയർ ടീമുമായി ടി20 ലോകകപ്പിന് യാത്ര തിരിച്ചതിനാൽ ശിഖർ ധവാനാണ് ഇന്ത്യൻ ടീമിനെ നയിക്കുക. ശ്രേയസ് അയ്യരാണ് ടീമിൻ്റെ വൈസ് ക്യാപ്റ്റൻ. മധ്യപ്രദേശുകാരൻ ബാറ്റർ രജത് പട്ടിദാറും ബംഗാളിൽ നിന്നുള്ള പേസർ മുകേഷ് കുമാറുമാണ് ടീമിലെ പുതുമുഖങ്ങൾ. സഞ്ജു സാംസൺ ഇന്ത്യൻ ടീമിൽ ഇടംപിടിച്ചിട്ടുണ്ട്. ന്യൂസിലൻഡ് എയ്ക്കെതിരായ ഏകദിന പരമ്പരയിൽ സഞ്ജു പുറത്തെടുത്ത മികച്ച പ്രകടനം ആരാധകർക്ക് വലിയ പ്രതീക്ഷ നൽകുന്നുമുണ്ട്.
ഈ മാസം ഒമ്പതിന് റാഞ്ചിയിൽ രണ്ടാം ഏകദിനവും ഈ മാസം 11-ന് ദില്ലിയിൽ മൂന്നാം ഏകദിനവും നടക്കും. മൂന്ന് മത്സര ട്വൻറി-20 പരമ്പര 2-1 ന് നേടിയതിൻ്റെ ആത്മവിശ്വാസത്തിലാണ് ടീംഇന്ത്യ ഏകദിന പരമ്പരയ്ക്കിറങ്ങുന്നത്.
