ലോങ്ങ് ജമ്പിൽ എം ശ്രീശങ്കറിന്‌ വെള്ളി. കോമൺവെൽത്ത്‌ ഗെയിംസ്‌ പുരുഷന്മാരുടെ ലോങ്ജമ്പിൽ 8.08 മീറ്റർ മറികടന്നാണ്‌ ഈ കുതിപ്പ്‌. ആദ്യ നാലു ചാട്ടം പൂർത്തിയാവുമ്പോഴും അഞ്ചാം സ്ഥാനത്തായിരുന്ന ശ്രീശങ്കർ അഞ്ചാമത്തെ ചാട്ടത്തിലാണ് വെള്ളി മെഡൽ സ്വന്തമാക്കിയത്. പുരുഷന്മാരുടെ ലോങ്ജമ്പിൽ കോമൺവെൽത്ത്‌ ഗെയിംസ്‌ മെഡൽ നേടുന്ന ആദ്യ ഇന്ത്യക്കാരനാണ്‌ ഈ പാലക്കാട്ടുകാരൻ.
യോഗ്യതാ റൗണ്ടിൽ 8.05 മീറ്റർ ചാടിയ ശ്രീശങ്കറിന്റെ ഫൈനലിലെ ആദ്യ ചാട്ടം 7.60 മീറ്ററായിരുന്നു. അടുത്ത രണ്ട്‌ ചാട്ടവും 7.84 മീറ്റർ. മൂന്ന്‌ ചാട്ടം കഴിഞ്ഞപ്പോൾ ആറാം സ്ഥാനത്ത്‌. നാലാമത്തെ ചാട്ടം നേരിയ വ്യത്യാസത്തിന്‌ ഫൗളായി. അഞ്ചാമത്തേത്‌ മെഡലായി. ആറാമത്തെ ചാട്ടവും നേരിയ വ്യത്യാസത്തിന്‌ ഫൗൾ. ഒളിമ്പിക്സിലെയും ലോക അത്‌ലറ്റിക് ചാമ്പ്യൻഷിപ്പിലെയും ഇന്ത്യയുടെ നിരാശ മറികടക്കുന്നതാണ് ശ്രീശങ്കറിന്റെ നേട്ടം.
