തീവ്രവാദിയുമായി കൂടിക്കാഴ്ച നടത്തിയാൽ തീവ്രവാദിയാകില്ല; ബോംബെ ഹൈക്കോടതി

തീവ്രവാദികളുമായി കൂടിക്കാഴ്ച നടത്തിയതുകൊണ്ട് മാത്രം ഒരാൾ തീവ്രവാദ പ്രവർത്തനങ്ങളുടെ ഭാഗമായെന്ന് പറയാനാകില്ലെന്ന് ബോംബെ ഹൈക്കോടതി. പ്രവീൺ തൊഗാഡിയയെയും നരേന്ദ്ര മോദിയെയും വധിക്കാൻ ശ്രമിച്ചെന്ന കേസിൽ പ്രതിക്ക് ജാമ്യം നൽകിയ ബോംബെ ഹൈക്കോടതിയുടേതാണ് ഈ നിരീക്ഷണം. 2006ൽ ഔറംഗാബാദിൽ നിന്ന് രണ്ട് വാഹനങ്ങളിൽ കടത്തിയിരുന്ന ആയുധങ്ങൾ എടിഎസ് പിടികൂടിയിരുന്നു. ആയുധങ്ങൾ പ്രവീൺ തൊഗാഡിയയെയും നരേന്ദ്ര മോദിയെയും വധിക്കാൻ എത്തിച്ചതാണെന്നായിരുന്നു അന്വേഷണ സംഘത്തിന്റെ കണ്ടെത്തൽ. ഈ കേസിൽ പത്തുവർഷങ്ങൾക്കു ശേഷം ബിലാൽ അബ്ദുൽ റസാഖ് ജീവപര്യന്തം ശിക്ഷിക്കപ്പെട്ടിരുന്നു. ഇതിനെതിരെയാണ് ബിലാൽ അബ്ദുൽ റസാഖ് അപ്പീലുമായി ഹൈക്കോടതിയെ സമീപിച്ചത്. ബിലാലിനെതിരെ മറ്റു പ്രതികൾ നൽകിയ മൊഴികൾമാത്രം കണക്കിലെടുക്കാനാകില്ലെന്നും കോടതി നിരീക്ഷിച്ചു.