കൊച്ചി: ഗവർണർ ആരിഫ് മുഹമ്മദ് ഖാന് വീണ്ടും തിരിച്ചടി. കേരള സർവകലാശാല സെനറ്റിലേക്ക് ഗവർണർ നാമനിർദേശം ചെയ്ത പേരുകൾ സ്റ്റേ ചെയ്ത നടപടി നീക്കണമെന്ന ഗവർണറുടെ ഹർജി ഹൈക്കോടതി തള്ളി. സ്റ്റേ മൂന്നാഴ്ചത്തേക്ക് കൂടി നീട്ടി. ചാൻസലർ നാമനിർദേശം ചെയ്ത വിദ്യാർഥികളുടെ അധികയോഗ്യത വ്യക്തമാക്കണമെന്ന് ഹൈക്കോടതി പറഞ്ഞു. ജസ്റ്റിസ് ടി ആർ രവിയുടേതാണ് വാക്കാലുള്ള പരാമർശം. ഹർജി ക്രിസ്തുമസ് അവധിക്കു ശേഷം വീണ്ടും പരിഗണിക്കും.
കേരള സർവകലാശാലയുടെ ചട്ടങ്ങളും കീഴ്വഴക്കങ്ങളും അട്ടിമറിച്ച് എബിവിപിക്കാരെ സെനറ്റിലേക്ക് തിരുകികയറ്റിയ ചാൻസലർകൂടിയായ ഗവർണറുടെ നടപടിക്കാണ് വീണ്ടും തിരിച്ചടിയുണ്ടായിരിക്കുന്നത്. വിദ്യാർഥി മണ്ഡലത്തിൽ നിന്ന് സെനറ്റിലേക്ക് സർവകലാശാല നൽകിയ പട്ടിക അട്ടിമറിച്ച് ചാൻസലർ നടത്തിയ നാല് നാമനിർദേശം ഹൈക്കോടതി സ്റ്റേ ചെയ്തിരുന്നു. ഇതിന് പിന്നാലെയാണ് സ്റ്റേ തുടരാൻ കോടതി ഉത്തരവിട്ടത്.
