മലപ്പുറം: നവകേരള സദസ്സിൽ പങ്കെടുത്ത് പാണക്കാട് ഹൈദരലി തങ്ങളുടെ മരുമകൻ ഹസീബ് സക്കാഫ് തങ്ങൾ. മലപ്പുറം ജില്ലയിലെ പ്രഭാതയോഗത്തിലാണ് അദ്ദേഹം പങ്കെടുത്തത്. ‘നാടിൻ്റെ വികസനത്തിന് കക്ഷി രാഷ്ട്രീയം നോക്കാതെ ഒന്നിയ്ക്കണമെന്ന് ഹസീബ് തങ്ങൾ പറഞ്ഞു. നാട്ടുകാരൻ എന്ന നിലയിലാണ് പങ്കെടുത്തതെന്നും അദ്ദേഹം വ്യക്തമാക്കി. ഡി.സി.സി. മുൻ അംഗവും തിരുനാവായ മുൻ ബ്ലോക്ക് അംഗവുമായ സി. മൊയ്തീനും തിരൂരിലെ പ്രഭാതയോഗത്തിൽ പങ്കെടുത്തു. മുസ്ലിം ലീഗ് പ്രാദേശിക നേതാവ് പിപി ഇബ്രാഹം മാസ്റ്ററും നവകേരള സദസിലെ യോഗത്തിനെത്തിയിരുന്നു.
കഴിഞ്ഞദിവസം കോഴിക്കോട് ജില്ലയിലെ പരിപാടിയിൽ നാല് യു.ഡി.എഫ്. നേതാക്കൾ പങ്കെടുത്തിരുന്നു. കോൺഗ്രസ് ബ്ലോക്ക് കമ്മിറ്റഇ അംഗം എൻ. അബൂബക്കർ, യു.ഡി.എഫ്. കൊടുവള്ളി മേഖലാ തിരഞ്ഞെടുപ്പ് കമ്മിറ്റി കൺവീനറായിരുന്ന മാധവൻ നമ്പൂതിരി മക്കാട്ടില്ലം, അടിവാരം-വയനാട് ചുരം സംരക്ഷണസമിതി പ്രസിഡന്റും കട്ടിപ്പാറ പയോണ വാർഡ് മുസ്ലിംലീഗ് കമ്മിറ്റി പ്രസിഡന്റുമായ വി.കെ. മൊയ്തു മുട്ടായി, കൊടുവള്ളി നിയോജകമണ്ഡലം ലീഗ് സെക്രട്ടറി യു.കെ. ഹുസൈൻ എന്നിവരാണ് ലീഗിൽനിന്ന് പങ്കെടുത്തത്.
