പ്രിയ വര്‍ഗീസ് കേസ് വിധിയില്‍ കേരളത്തിലെ നെറികെട്ട മാധ്യമ പ്രവര്‍ത്തനത്തെക്കുറിച്ച് ഹൈക്കോടതി ഡിവിഷന്‍ ബെഞ്ച് നടത്തിയ നിരീക്ഷണങ്ങളും നിര്‍ദ്ദേശങ്ങളും
കേസ് പരിഗണനാ വേളയില്‍ ജഡ്ജിമാരുടെ വാക്കാലുള്ള പരാമര്‍ശങ്ങള്‍ എടുത്ത് അഭിപ്രായപ്രകടനവും വ്യാഖ്യാനവും നടത്തി കക്ഷികളുടെ മാന്യതയ്ക്കും യശസ്സിനും ആഘാതം ഉണ്ടാക്കുന്ന രീതി മാധ്യമങ്ങള്‍ അവസാനിപ്പിക്കണം.
കേസ് ജയിച്ചാല്‍ പോലും ഇത്തരം പരാമര്‍ശങ്ങള്‍ കക്ഷികള്‍ക്കുണ്ടാക്കുന്ന ദോഷം മാറില്ല.
ഭരണഘടന നല്‍കുന്ന സ്വകാര്യതയ്ക്കുള്ള അവകാശം മൗലികാവകാശമാണ്.
സ്വകാര്യത എന്നാല്‍ ഒരാള്‍ക്ക് സ്വന്തം അന്തസ്സ് സംരക്ഷിക്കാനുള്ള അവകാശം കൂടിയാണ്. ഭരണകൂടത്തിന്റെ ഏകപക്ഷീയമായ നടപടികളില്‍ നിന്നു മാത്രമല്ല മാധ്യമങ്ങളില്‍ നിന്നും സ്വകാര്യവ്യക്തികളില്‍ നിന്നും ഈ സംരക്ഷണം ലഭിക്കണം.
മാധ്യമങ്ങള്‍
ഉത്തരവാദിത്വത്തോടു കൂടെ വാര്‍ത്തകള്‍ റിപ്പോര്‍ട്ട് ചെയ്യാനുള്ള ഒരു പെരുമാറ്റച്ചട്ടം സ്വീകരിയ്ക്കണം
ഈ കേസ് അവസാനിപ്പിക്കുന്നതിനു മുമ്പ്, ഈ കേസിന് ലഭിച്ച മാധ്യമശ്രദ്ധ കണക്കിലെടുത്ത് കുറച്ച് നിരീക്ഷണങ്ങള്‍ നടത്തുന്നത് ഉചിതമാണെന്ന് ഞങ്ങള്‍ കരുതുന്നു.
അക്കാദമിക് ബോഡികളുടെ തീരുമാനങ്ങളില്‍
ഇടപെടുമ്പോള്‍ കോടതികള്‍ ജാഗ്രത പാലിക്കേണ്ടത് വളരെ അനിവാര്യമാണ്, കാരണം പല തീരുമാനങ്ങളുടെയും നിയമസാധുത പരിശോധിക്കുമ്പോള്‍ അപരിചിതമായ പല കാര്യങ്ങളും കയറി വരും. അക്കാദമിക് പദപ്രയോഗങ്ങളില്‍ ഉള്‍പ്പെടുത്തിയിരിക്കുന്ന വ്യവസ്ഥകളുടെ യഥാര്‍ത്ഥ വ്യാപ്തി പരിശോധിക്കുമ്പോള്‍ പല ബുദ്ധിമുട്ടുകളും നേരിടും. കാരണം സന്ദര്‍ഭങ്ങള്‍ക്കനുസരിച്ചു സ്വീകരിക്കാവുന്ന ധാരാളം വ്യാഖ്യാനങ്ങള്‍ക്കുള്ള സാധ്യത ഇവിടെയുണ്ട്. അത്തരം സന്ദര്‍ഭങ്ങളില്‍, അക്കാദമിക് വിദഗ്ദ്ധരുടെ വീക്ഷണങ്ങള്‍ക്ക് അര്‍ഹമായ വെയിറ്റേജ് നല്‍കുക എന്നതാണ് സ്വീകരിക്കാവുന്ന ഉചിതമായ തീരുമാനം. യുക്തി പ്രകാരം കേസുകളുടെ നടപടികളുമായി മുന്നോട്ടുപോകുമ്പോള്‍ വിദഗ്ധ അക്കാദമിക് സമിതികളുടെ തീരുമാനങ്ങള്‍ക്ക് മതിയായ പരിഗണന നല്‍കാറുണ്ട്. അത്തരം സമിതികളുടെ തീരുമാനങ്ങളില്‍ ഇടപെടുന്നത് നിയമത്തിലെ വകുപ്പുകളുടെ കൃത്യമായ ലംഘനം കാണപ്പെടുമ്പോഴോ അവരുടെ തീരുമാനങ്ങളില്‍ ജൂഡിഷ്യല്‍ റിവ്യൂ ആവശ്യമുള്ള കാരണങ്ങള്‍ കാണുമ്പോഴോ ആണ്.
അക്കാദമിക് മേഖലയുമായി ബന്ധപ്പെട്ട ചില തീരുമാനങ്ങള്‍ക്ക് പതിവില്‍ കവിഞ്ഞ മാധ്യമ ശ്രദ്ധ ലഭിക്കുകയും അതുമായി ബന്ധപ്പെട്ട ചര്‍ച്ചകള്‍, സോഷ്യല്‍ മീഡിയ പോസ്റ്റുകള്‍ തുടങ്ങിയവ കോടതി വ്യവഹാരങ്ങളെ ബാധിക്കാതെ മൂന്നോട്ടു കൊണ്ടുപോകാന്‍ കോടതികള്‍ നിര്‍ബന്ധിതമാവുകയും ചെയ്യുന്ന സന്ദര്‍ഭങ്ങള്‍ വളരെ കൂടുതലാണ്.
കോടതിയുടെ പരിഗണനയിലുള്ള വിഷയങ്ങളില്‍ ഇത്തരത്തിലുള്ള ചര്‍ച്ചകള്‍ ഒഴിവാക്കണമെന്ന് അച്ചടി-ഇലക്ട്രോണിക് മാധ്യമങ്ങളെ വീണ്ടും വീണ്ടും ഓര്‍മിപ്പിക്കുന്നത് നിയമവാഴ്ച ശക്തിപ്പെടുത്തി നീതി നടപ്പിലാക്കുന്നത് എളുപ്പമാക്കാനാണ്.
കോടതിയില്‍ കേസ് നടക്കുമ്പോള്‍ ഒരു ജഡ്ജിയുടെ വാക്കാലുള്ള പരാമര്‍ശങ്ങളെ അടിസ്ഥാനമാക്കി, മാന്യമല്ലാത്ത അഭിപ്രായങ്ങളിലൂടെയും പരാമര്‍ശങ്ങളിലൂടെയും കക്ഷിയുടെ അന്തസ്സിനും സല്‍പ്പേരിനും വരുത്തുന്ന നഷ്ടത്തിന്റെ ഉത്തരവാദിത്തത്തില്‍ നിന്ന് മാധ്യമങ്ങള്‍ക്ക് ഒഴിഞ്ഞുമാറാനാവില്ല.
വ്യവഹാരത്തില്‍ കക്ഷി വിജയിച്ചോ ഇല്ലയോ എന്നത് ഇവിടെ വിഷയമല്ല. വാദം കേള്‍ക്കുന്ന ജഡ്ജി നടത്തുന്ന പരാമര്‍ശങ്ങള്‍ കേസിന്റെ മെറിറ്റിനെ കുറിച്ചുള്ള അദ്ദേഹത്തിന്റെ നിരീക്ഷണങ്ങളായി പരിഗണിക്കാനാവില്ലെന്ന് ഈയിടെ പറഞ്ഞത് രാജ്യത്തിന്റെ സുപ്രീം കോടതി ചീഫ് ജസ്റ്റിസ് ആണ്.
ന്യായമായ വിചാരണയ്ക്കുള്ള അവകാശം ഭരണഘടനയുടെ ആര്‍ട്ടിക്കിള്‍ 21 പ്രകാരം ഒരു പൗരന്റെ മൗലികാവകാശത്തിന്റെ ഭാഗമാണെന്ന് പണ്ടേ അംഗീകരിക്കപ്പെട്ടിരുന്നുവെങ്കിലും, അടുത്ത കാലത്തായി, സ്വകാര്യതയ്ക്കുള്ള അവകാശവും അതിന്റെ ഭാഗമായി അംഗീകരിക്കപ്പെട്ടു (K.S. Puttaswamy & Anr v. Union of India & Ors ലെ സുപ്രീം കോടതി. – [(2017) 10 എസ്സിസി 11). പ്രസ്തുത വിധിക്ക് മുമ്പുതന്നെ, ഒരാളുടെ സല്‍പ്പേര് സംരക്ഷിക്കാനുള്ള അയാളുടെ അവകാശം ഭരണഘടനയുടെ ആര്‍ട്ടിക്കിള്‍ 21 പ്രകാരം മൗലികാവകാശത്തിന്റെ ഭാഗമായി അംഗീകരിക്കപ്പെട്ടിരുന്നു (നദ്കര്‍ണി – [(1983) 1 SCC 124]). 1965ലെ സിവില്‍, പൊളിറ്റിക്കല്‍ റൈറ്റ്സ് ഓണ്‍ ഇന്റര്‍നാഷണല്‍ കണ്‍വെന്‍ഷന്‍, മറ്റുള്ളവരുടെ സല്‍പ്പേരിനുള്ള അവകാശത്തിന് വിധേയമായി മാത്രമേ അഭിപ്രായങ്ങള്‍ പ്രകടിപ്പിക്കാനുള്ള അവകാശവും അഭിപ്രായ സ്വാതന്ത്ര്യത്തിനുള്ള അവകാശവും നിലനില്‍ക്കുന്നുള്ളുവെന്ന് പറയുന്നു. ബിഹാര്‍ വേഴ്‌സസ് ലാല്‍ കൃഷ്ണ അദ്വാനി- [(2003) 8 SCC 3611-ലും ഈ അവകാശം അംഗീകരിക്കപ്പെട്ടതാണ്.
ഒരു വ്യക്തിയുടെ നടപടികള്‍ മൂലം മറ്റൊരു വ്യക്തിയുടെ സ്വകാര്യത ലംഘിക്കപ്പെടുന്ന അവസ്ഥ ഉണ്ടാവാതിരിക്കാന്‍ നമ്മുടെ മൗലികാവകാശങ്ങളില്‍ പലതിനും ഭരണഘടന തന്നെ നിയന്ത്രണങ്ങള്‍ ഏര്‍പ്പെടുത്തിയിട്ടുള്ളതായി ഗ്രാന്‍വില്‍ ഓസ്റ്റിന്‍ നമ്മുടെ ഭരണഘടനയെക്കുറിച്ചുള്ള തന്റെ ‘The Indian Constitution – The Cornerstone of a Nation’ എന്ന പ്രബന്ധത്തില്‍ പറയുന്നുണ്ട്.
ആര്‍ട്ടിക്കിള്‍ 23 ല്‍ വ്യക്തിയുടെ സ്വകാര്യതയെന്നത് മൗലികാവകാശമായി അംഗീകരിക്കപ്പെട്ട കാര്യമാണ്. സ്വന്തം അന്തസും സല്‍പ്പേരും സംരക്ഷിക്കാനുള്ള അവകാശവും അതിന്റെ ഭാഗമായി വരും.
ഇതിന്റെ വ്യവസ്ഥകള്‍ ഭരണകൂടത്തിന്റെ ഭാഗത്തു നിന്നുള്ള നീക്കങ്ങളെ നിയന്ത്രിക്കാന്‍ വേണ്ടി മാത്രമല്ല ഉപയോഗിക്കേണ്ടത്. സ്വകാര്യവ്യക്തികള്‍, മാധ്യമങ്ങളടക്കമുള്ള സ്ഥാപനങ്ങള്‍ തുടങ്ങിയവ മറ്റൊരു വ്യക്തിയുടെ സ്വകാര്യതയിലേക്കും സല്‍പ്പേരിലേക്കും കൈകടത്തുന്നത് തടയാനും ഈ അവകാശം വഴി സാധിക്കണം.
അതിനാല്‍, മാധ്യമങ്ങള്‍ കോടതിയുടെ ഈ നിരീക്ഷണങ്ങള്‍ ശ്രദ്ധിക്കുമെന്നും വരും ദിവസങ്ങളില്‍ സ്വമേധയാ ഉത്തരവാദിത്തമുള്ള പെരുമാറ്റരീതി അവലംബിച്ചു റിപ്പോര്‍ട്ട് ചെയ്യുമെന്നും ഞങ്ങള്‍ വിശ്വസിക്കുന്നു.’
