പാലക്കാട് യുവാവിനെ ഭീഷണിപ്പെടുത്തി കൈക്കൂലി വാങ്ങിയ എക്സൈസ് ഉദ്യോഗസ്ഥനെ സസ്‌പെൻഡ് ചെയ്തു. പാലക്കാട് സിവിൽ എക്സൈസ് ഓഫീസർ ടി എസ് അനിൽകുമാറിനാണ് സസ്പെൻഷൻ. ബീവറേജസിൽ നിന്ന് മദ്യം വാങ്ങി മടങ്ങുകയായിരുന്ന യുവാവിനെയാണ് ഭീഷണിപ്പെടുത്തി പണം തട്ടിയത്. പണം തന്നില്ലെങ്കിൽ കേസിൽ കുടുക്കുമെന്നായിരുന്നു ഭീഷണി. മൂന്നു ലിറ്റർ മദ്യം ബിവറേജിൽ നിന്ന് വാങ്ങി വരുമ്പോഴാണ് പരാതിക്കാരനെ ഭീഷണിപ്പെടുത്തിയത്. 15,000 രൂപയാണ് ആവശ്യപ്പെട്ടത്. ആദ്യ ഗഡുവായ 5000 രൂപ ഗൂഗിൾ പേ വഴി വാങ്ങി.
അനിൽ കുമാറിൻ്റെ പ്രവൃത്തി വകുപ്പിനെ അപകീർത്തിപ്പെടുത്തുന്നതെന്ന് കണ്ടെത്തിയതായി ചൂണ്ടിക്കാണിച്ച് പാലക്കാട് ഡെപ്യൂട്ടി എക്സൈസ് കമ്മീഷണർ ആണ് നടപടിയെടുത്തത്.
