സ്ത്രീത്വത്തെ അപമാനിച്ച കേസിൽ നടൻ ശ്രീനാഥ് ഭാസി അറസ്റ്റിൽ. കൊച്ചി മരട് പോലീസാണ് ശ്രീനാഥ് ഭാസിയെ അറസ്റ്റ് ചെയ്‌തത്‌. സ്ത്രീത്വത്തെ അപമാനിക്കൽ, അസഭ്യം പറയുക തുടങ്ങിയ വകുപ്പുകൾ ശ്രീനാഥ് ഭാസിക്കെതിരെ ചുമത്തിയിട്ടുണ്ട്.
ശ്രീനാഥ് ഭാസിയുടെ ചിത്രം ചട്ടമ്പിയുടെ പ്രൊമോഷന്റെ ഭാഗമായി എത്തിയപ്പോഴാണ് നടൻ അവതാരകയോട് അപമാര്യാദയായി പെരുമാറിയത്. തുടർന്ന് അവതാരക പോലീസിനും വനിതാ കമ്മീഷനും പരാതി നൽകുകയായിരുന്നു. അഭിമുഖത്തിൽ ചോദിച്ച ചോദ്യങ്ങൾ ഇഷ്ടപ്പെടാതിരുന്നതോടെ ശ്രീനാഥ് ഭാസി മോശം ഭാഷാ പ്രയോഗങ്ങൾ നടത്തി. താൻ ജോലി ചെയ്യുന്ന സ്ഥാപനത്തിലെ ക്യാമറാമാനോട് മോശമായി പെരുമാറിയെന്നും അവതാരകയുടെ പരാതിയിലുണ്ട്.
നിർമ്മാതാക്കളുടെ സംഘടനയ്ക്കും അവതാരക പരാതി നൽകിയിട്ടുണ്ട്. വിഷയത്തിൽ ഖേദം പ്രകടിപ്പിക്കുന്നതായി ശ്രീനാഥ് ഭാസി അറിയിച്ചിരുന്നു. തന്റെ ഭാഗത്ത് നിന്നുണ്ടായ തെറ്റിന് ആരോട് വേണമെങ്കിലും താൻ ക്ഷമാപണം നടത്താൻ തയ്യാറാണെന്നും നടൻ വ്യക്തമാക്കി.
