കൊൽക്കത്ത: ലെസ്ബിയൻ ആണെന്ന് സംശയിച്ച് യുവതികൾക്ക് ക്രൂര മർദനം. പശ്ചിമ ബംഗാളിലെ മുർഷിദാബാദ് ജില്ലയിലാണ് സംഭവം. രണ്ട് സ്ത്രീകളുടെ സ്വകാര്യഭാഗങ്ങളിൽ ഇരുമ്പ് വടി ചൂടാക്കി പോള്ളലേൽപ്പിച്ചു. യുവതികളുടെ ബന്ധുക്കളിൽ ഒരാളാണ് ആക്രമണം നടത്തിയത്. സംഭവത്തിൽ ഇരകൾ സാഗർദിഗി പൊലീസ് സ്റ്റേഷനിൽ പരാതി നൽകി. മറ്റൊരു നാട്ടുകാരൻ്റെ സഹായത്തോടെ ഇരകളെ ബലാത്സംഗം ചെയ്യാൻ പ്രതി ശ്രമിച്ചതായി പൊലീസ് വൃത്തങ്ങൾ പറഞ്ഞു. ഇരകൾ പോലീസിൽ പരാതി നൽകിയതോടെയാണ് സംഭവം പുറത്തറിഞ്ഞത്.
‘പെൺകുട്ടികൾ രണ്ടുപേരും ഒരുമിച്ചാണ് വളർന്നത്. അവർ പരസ്പരം പിന്തുണയ്ക്കുകയും സഹവാസം ആസ്വദിക്കുകയും ചെയ്യുന്നു.’ – സംഭവമറിഞ്ഞ് സാഗർദിഗി ഗ്രാമത്തിലേക്ക് ഓടിയെത്തിയ ഇരയുടെ അമ്മ പറഞ്ഞു. അവരുടെ സൗഹൃദം നാട്ടുകാർ അംഗീകരിച്ചില്ലെന്നും അമ്മ കൂട്ടിച്ചേർത്തു. ഗ്രാമത്തിൽ മുത്തശ്ശിയോടൊപ്പമാണ് പെൺകുട്ടി താമസിച്ചിരുന്നത്.
‘ഞാനും എൻ്റെ സുഹൃത്തും എല്ലാ ദിവസവും കണ്ടുമുട്ടുകയും ബീഡി കെട്ടുകയും ചെയ്യും. പക്ഷേ ഒക്ടോബർ 25 ന് ഞാൻ അവളെ കണ്ടില്ല. പിന്നീട് രാത്രിയിൽ അവൾ എന്നെ വിളിച്ച് കാണാൻ വരാൻ ആവശ്യപ്പെട്ടു. കഠിനമായ വേദന അനുഭവിക്കുകയാണെന്ന് അവൾ പറഞ്ഞു. അന്നു രാത്രി അവിടെ തങ്ങാൻ ആവശ്യപ്പെടുകയും ചെയ്തു’ – ഇരകളിൽ ഒരാൾ പറയുന്നു. ഇരയുടെ ബന്ധുക്കളായ രണ്ട് പ്രതികളും സഹീബുൽ ഷെയ്ഖ് എന്ന മറ്റൊരു നാട്ടുകാരനും രാവിലെ 11 മണിയോടെ പെൺകുട്ടികൾ ഉറങ്ങിക്കിടന്ന മുറിയിലേക്ക് അതിക്രമിച്ചു കയറി. പെൺകുട്ടികൾ ഒരേ കിടക്ക പങ്കിടുന്നത് എന്തുകൊണ്ടാണെന്ന് അദ്ദേഹം ചോദിച്ചതായി റിപ്പോർട്ടുണ്ട്. “ഞങ്ങൾ സുഹൃത്തുക്കളാണ്” ഒരു പെൺകുട്ടി അവരോട് പറഞ്ഞു. എന്നാൽ മൂവരും ചേർന്ന് പെൺകുട്ടികളെ ക്രൂരമായി പീഡിപ്പിക്കുകയും മർദിക്കുകയും ചെയ്യുകയായിരുന്നു.
കേസിലെ മൂന്ന് പ്രതികളിൽ ഒരാളെ ഔതുവ ഗ്രാമത്തിൽ നിന്ന് തിങ്കളാഴ്ച മാൾഡ പൊലീസ് പിടികൂടിയിരുന്നു. അതേസമയം, കദം, സാഹിബ് എന്നിങ്ങനെയുള്ള മറ്റ് രണ്ട് പേർ ഇപ്പോൾ ഒളിവിലാണെന്ന് പൊലീസ് വൃത്തങ്ങൾ അറിയിച്ചു.
