തെന്നിന്ത്യൻ സൂപ്പർ താരം സാമന്ത കേന്ദ്ര കഥാപാത്രമാകുന്ന ശാകുന്തളം എന്ന ചിത്രത്തിൻറെ ട്രെയ്‍ലർ പുറത്തിറങ്ങി. സാമന്ത ശകുന്തളയാവുമ്പോൾ ദുഷ്യന്തനായി എത്തുന്നത് മലയാളി താരം ദേവ് മോഹൻ ആണ്. മലയാളം ഉൾപ്പെടെയുള്ള ഭാഷകളിൽ ട്രെയ്‍ലർ പുറത്തെത്തിയിട്ടുണ്ട്. ഫെബ്രുവരി 17 നാണ് ചിത്രം തിയറ്ററുകളിൽ എത്തുന്നത്.
ഗുണശേഖർ രചനയും സംവിധാനവും നിർവ്വഹിക്കുന്ന ചിത്രം തെലുങ്കിൽ നിന്നുള്ള അടുത്ത പാൻ ഇന്ത്യൻ ചിത്രമാണ്. മഹാഭാരതത്തിലെ ഉപകഥയെ ആസ്പദമാക്കി കാളിദാസൻ രചിച്ച പ്രശസ്ത നാടകം അഭിജ്ഞാന ശാകുന്തളത്തെ അധികരിച്ചാണ് ഗുണശേഖർ തിരക്കഥ ഒരുക്കിയിരിക്കുന്നത്.
അല്ലു അർഹ, സച്ചിൻ ഖേഡേക്കർ, കബീർ ബേദി, ഡോ. എം മോഹൻ ബാബു, പ്രകാശ് രാജ്, മധുബാല, ഗൌതമി, അദിതി ബാലൻ, അനന്യ നാഗല്ല, ജിഷു സെൻഗുപ്ത തുടങ്ങിയവരാണ് ചിത്രത്തിൽ എത്തുന്ന മറ്റ് താരങ്ങൾ. ഗുണ ടീം വർക്സിൻറെ ബാനറിൽ നീലിമ ഗുണ നിർമ്മിച്ചിരിക്കുന്ന ചിത്രം അവതരിപ്പിക്കുന്നത് ശ്രീ വെങ്കടേശ്വര ക്രിയേഷൻസിൻറെ ബാനറിൽ ദിൽ രാജുവാണ്.
വിജയ് നായകനായി റിലീസിനൊരുങ്ങിയിരിക്കുന്ന ചിത്രം വാരിസിൻറെ നിർമാതാവ് കൂടിയാണ് ഇദ്ദേഹം. മണി ശർമ്മ സംഗീതം പകരുന്ന ചിത്രത്തിൻറെ എഡിറ്റിംഗ് പ്രവീൺ പുടിയാണ്.
ഛായാഗ്രഹണം ശേഖർ വി ജോസഫ്, കലാസംവിധാനം അശോക്, വി എഫ് എക്സ് സൂപ്പർവൈസർ അളകസാമി മയൻ, വരികൾ ചൈതന്യ പ്രസാദ്, ശ്രീമണി, നൃത്തസംവിധാനം രാജു സുന്ദരം, സംഘട്ടന സംവിധാനം വെങ്കട്, കിംഗ് സോളമൻ, എക്സിക്യൂട്ടീവ് പ്രൊഡ്യൂസർ കൊമ്മിനേനി വെങ്കടേശ്വര റാവു, ഹേമാമ്പർ ജസ്തി, ലൈൻ പ്രൊഡ്യൂസർ യശ്വന്ത്, സംഭാഷണം ശ്രീ മാധവ് ബുറ, വസ്ത്രാലങ്കാരം നീത ലുല്ല, ഡി ഐ അന്നപൂർണ സ്റ്റുഡിയോസ്.
