തെലുങ്ക് സൂപ്പർ താരം സുന്ദീപ് കിഷൻ നായകനായി എത്തുന്ന പാൻ ഇന്ത്യൻ ചിത്രമായ മൈക്കിളിന്റെ റിലീസ് തീയതി പ്രഖ്യാപിച്ചു. ഫെബ്രുവരി മൂന്നിനാണ് ചിത്രം പ്രദർശനത്തിനെത്തുന്നത്. തിരക്കഥയും സംവിധാനവും രഞ്ജിത്ത് ജെയകൊടിയാണ് നിർവ്വഹിക്കുന്നത്. അയ്യപ്പ ശർമ, ഗൗതം വാസുദേവ് മേനോൻ, ദിവ്യാൻശ കൗശിക്, വരുൺ സന്ദേശ്, വിജയ് സേതുപതി, അനസൂയ ഭരദ്വാജ് തുടങ്ങിയവരാണ് ചിത്രത്തിൽ കേന്ദ്രകഥാപാത്രങ്ങളിൽ എത്തുന്നത്.
നേരത്തെ ‘മൈക്കിളി’ലെ ‘നീവുന്റെ ചാലു’ എന്ന ഗാനവും പുറത്ത് വിട്ടിരുന്നു. പ്രേക്ഷക പ്രീതി നേടിയ ഗാനത്തിന്റെ സംഗീത സംവിധാനം സാം സി എസ് ആണ് നിർവഹിക്കുന്നത്. ചിത്രസംയോജനം ആർ സത്യനാരായണൻ, സ്റ്റണ്ട്‌സ് ദിനേഷ് കാശി, ഡിഐ കളറിസ്റ്റ് സുരേഷ് രവി, കോസ്റ്റ്യൂസ് രജിനി, പിആർഒ വംശി ശേഖർ എന്നിവരാണ് ‘മൈക്കിൾ’ എന്ന ചിത്രത്തിന്റെ മറ്റ് പ്രവർത്തകർ.
സുന്ദീപ് കിഷൻ തമിഴിൽ ഒരു ഗംഭീര പ്രൊജക്റ്റിൽ ഭാഗമാകുന്നുണ്ട്. ലോകേഷ് കനകരാജിന്റെ ആദ്യ ചിത്രമായ ‘മാനഗര’ത്തിലടക്കമുള്ള ചിത്രങ്ങളിൽ സുപ്രധാന വേഷങ്ങൾ അവതരിപ്പിച്ച് തമിഴിൽ ശ്രദ്ധേയനായ സുന്ദീപ് കിഷൻ ധനുഷ് നായകനാകുന്ന ചിത്രത്തിലാണ് ഇപ്പോൾ അഭിനയിക്കുന്നത്. ‘ക്യാപ്റ്റൻ മില്ലെർ’ എന്ന ചിത്രത്തിൽ മികച്ച ഒരു കഥാപാത്രമാണ് സുന്ദീപ് കിഷന്. അരുൺ മതേശ്വരൻ ആണ് ചിത്രം സംവിധാനം ചെയ്യുന്നത്.
