മലായളത്തിന്റെ സ്വന്തം ലേഡീ സൂപ്പർ സ്റ്റർ കേന്ദ്ര കഥാപാത്രത്തിലെത്തുന്ന ഇൻഡോ-അറബിക് ചിത്രം ആയിഷയ്ക്കായി പ്രേക്ഷകർ കാത്തിരിപ്പിലാണ്. നേരത്തെ ചിത്രത്തിലെ മഞ്ജുവിന്റെ കഥാപാത്രത്തിന്റെ ലുക്ക് പ്രേക്ഷകരെ പരിചയപ്പെടുത്തിയിരുന്നു. ഇപ്പോൾ താരത്തിനൊപ്പം മലയാളത്തിന്റെ യുവതാരം രാധിക കൂടി എത്തുന്നുവെന്ന വാർത്തയാണ് പുറത്ത് വരുന്നത്. രാധികയുടെ ക്യാരക്ടർ പോസ്റ്റർ നടി മഞ്ജു തന്റെ ഫേസ്ബുക്ക് പേജിലൂടെ പങ്കുവെച്ചു. നിമിഷ നേരംകൊണ്ടാണ് പോസ്റ്റർ ആരാധകർക്കിടയിൽ നിറഞ്ഞത്.
നിഷ എന്ന കഥാപാത്രം രാധികയെ പുതിയ ഭാവത്തിലും വേഷപ്പകർച്ചയിലും അവതരിപ്പിക്കുന്ന ഒന്നാണ്. നവാഗതനായ ആമിർ പള്ളിക്കൽ സംവിധാനം ചെയ്യുന്ന ചിത്രം മലയാളത്തിനു പുറമെ ഇംഗ്ലീഷ്, അറബി, തമിഴ്, തെലുങ്ക്, ഹിന്ദി, കന്നഡ ഭാഷകളിലുമായാണ് പ്രദർശനത്തിനെത്തുക. ബിഗ് ബജറ്റിൽ ഒരുങ്ങുന്ന ചിത്രമാണ് ആയിഷ. മഞ്ജു വാര്യരുടെ അഭിനയ ജീവിതത്തിലെ ശ്രദ്ധേയ കഥാപാത്രങ്ങളിൽ ഒന്നുമാവും ഇതെന്നാണ് അണിയറക്കാരുടെ പ്രതീക്ഷ. ആഷിഫ് കക്കോടിയുടേതാണ് രചന. ക്രോസ് ബോർഡർ സിനിമയുടെ ബാനറിൽ സംവിധായകൻ സക്കറിയയാണ് നിർമ്മാണം. ഈ ചിത്രത്തിൽ പ്രശസ്ത ഇന്ത്യൻ, അറബ് പിന്നണി ഗായകർ പാടുന്നു എന്നൊരു പ്രത്യേകത കൂടി ഉണ്ട്.
ചിത്രത്തിന്റെ അണിയറ പ്രവർത്തകർ ഇവർ;
ഫെദർ ടച്ച് മൂവി ബോക്സ്, ഇമാജിൻ സിനിമാസ്, ലാസ്റ്റ് എക്സിറ്റ് സിനിമാസ്,മൂവീ ബക്കറ്റ് എന്നീ ബാനറുകളിൽ ശംസുദ്ധീൻ മങ്കരത്തൊടി, സക്കറിയ വാവാട്, ഹാരിസ് ദേശം, അനീഷ് പി ബി, ബിനീഷ് ചന്ദ്രൻ എന്നിവരാണ് ഈ ചിത്രത്തിന്റെ സഹ നിർമ്മാതാക്കൾ. ബി കെ ഹരിനാരായണൻ, സുഹൈൽ കോയ എന്നിവർ എഴുതിയ വരികൾക്ക് എം ജയചന്ദ്രൻ സംഗീത സംവിധാനം നിർവഹിക്കുന്നു.
എഡിറ്റിംഗ് അപ്പു എൻ ഭട്ടതിരി, കലാസംവിധാനം മോഹൻദാസ്, വസ്ത്രാലങ്കാരം സമീറ സനീഷ്, ചമയം റോണക്സ് സേവ്യർ, ചീഫ് അസ്സോസിയേറ്റ് ഡയറക്ടർ ബിനു ജി നായർ, ശബ്ദ സംവിധാനം വൈശാഖ്, സ്റ്റിൽസ് രോഹിത് കെ സുരേഷ്, ലൈൻ പ്രൊഡ്യൂസർ റഹിം പി എം കെ. ജനുവരി ഇരുപതിന് മാജിക് ഫ്രെയിംസ് ആയിഷ പ്രദർശനത്തിനെത്തിക്കും. പിആർഒ എ എസ് ദിനേശ്.
https://www.facebook.com/theManjuWarrier/posts/751790466303454
