തെന്നിന്ത്യൻ താരസുന്ദരി സാമന്തയും മലയാളി താരം ദേവ് മോഹനും ശകുന്തളയും ദുഷ്യന്തനുമായി എത്തുന്ന ‘ശാകുന്തള’ത്തിന്റെ റിലീസ് പ്രഖ്യാപിച്ചു. ഫെബ്രുവരി 17-ന് ചിത്രം തിയേറ്ററുകളിൽ പ്രദർശനത്തിന് എത്തുമെന്ന് അണിയറ പ്രവർത്തകർ അറിയിക്കുന്നു. ശാകുന്തളം 3ഡിയിൽ എത്തിക്കാനായിരുന്നു കഴിഞ്ഞ വർഷം നവംബറിൽ നിശ്ചയിച്ചിരുന്ന റിലീസ് നീട്ടിയത്.
‘രുദ്രമ ദേവി’ക്ക് ശേഷം ഗുണശേഖര തിരക്കഥയെഴുതി സംവിധാനം ചെയ്യുന്ന ചിത്രമാണ് ശാകുന്തളം. ‘അഭിജ്ഞാന ശാകുന്തളം’ എന്ന കൃതിയെ അടിസ്ഥാനപ്പെടുത്തിയാണ് ചിത്രം ഒരുക്കിയിരിക്കുന്നത്. കേട്ട് പഴകിയ പുരാണങ്ങളിൽ നിന്നും വ്യത്യസ്തമായി ശകുന്തളയുടെ കാഴ്ചപ്പാടിലൂടെയാണ് കഥ പറയുന്നതെന്ന് ചിത്രത്തിന്റെ അണിയറപ്രവർത്തകർ നേരത്തെ വ്യക്തമാക്കിയിരുന്നു.
അദിതി ബാലൻ, മോഹൻ ബാബു, പ്രകാശ് രാജ്, അനന്യ നാഹല്ലെ, മധു ബാല എന്നിവരാണ് മറ്റ് കഥാപാത്രങ്ങൾ. തെലുങ്ക് താരം അല്ലു അർജുന്റെ മകൾ അല്ലു അർഹ അഭിനയരംഗത്തേക്ക് അരങ്ങേറ്റം കുറിക്കുന്ന ചിത്രം കൂടിയാണ് ശാകുന്തളം. മലയാളം, കന്നഡ, ഹിന്ദി, തമിഴ്, തെലുങ്ക് എന്നീ ഭാഷകളിലാണ് ചിത്രം ഒരുങ്ങുന്നത്.
https://mobile.twitter.com/Samanthaprabhu2/status/1609784129096388609
