മോഹൻലാലിന്റേതായി പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിൽ ഒന്നാണ് എലോൺ. 12 വർഷത്തെ ഇടവേളയ്ക്ക് ശേഷം ഷാജി കൈലാസും മോഹൻലാലും ഒന്നിക്കുന്ന ചിത്രം എന്ന പ്രത്യേകതയാണ് ആരാധകരുടെ കാത്തിരിപ്പിന് ആധാരം. ഇപ്പോഴിതാ ചിത്രത്തിന്റെ ട്രെയിലർ സംബന്ധിച്ച വിവരം പുറത്തുവിട്ടിരിക്കുകയാണ് മോഹൻലാൽ. ട്രെയിലർ 2023 ജനുവരി 1ന് റിലീസ് ചെയ്യുമെന്ന വാർത്തയാണ് പുറത്ത് വരുന്നത്.
പുലർച്ചെ ഒരു മണിക്കാണ് ട്രെയിലർ പുറത്ത് വിടുകയെന്ന് താരം അറിയിക്കുന്നു. അടുത്ത വർഷം തന്നെ ചിത്രം റിലീസിന് എത്തുമെന്ന പ്രതീക്ഷയിലാണ് പ്രേക്ഷകരും. ട്രെയിലർ റിലീസ് പങ്കുവച്ച് കൊണ്ടുള്ള പുതിയ പോസ്റ്ററും അണിയറ പ്രവർത്തകർ പുറത്തുവിട്ടിട്ടുണ്ട്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമിക്കുന്ന ചിത്രമാണ് എലോൺ. 2009ൽ പുറത്തെത്തിയ ക്രൈം ത്രില്ലർ ചിത്രം ‘റെഡ് ചില്ലീസി’നു ശേഷം മോഹൻലാൽ നായകനാവുന്ന ഷാജി കൈലാസ് ചിത്രമാണ് എലോൺ. മുൻപ് ഷാജി കൈലാസിൻറെ ടൈം, സൗണ്ട് ഓഫ് ബൂട്ട്, മദിരാശി, ജിഞ്ചർ എന്നീ സിനിമകൾക്ക് രചന നിർവ്വഹിച്ച രാജേഷ് ജയരാമനാണ് തിരക്കഥ ഒരുക്കുന്നത്.
ഛായാഗ്രഹണം അഭിനന്ദൻ രാമാനുജം, എഡിറ്റിംഗ് ഡോൺ മാക്‌സ്, പ്രൊഡക്ഷൻ ഡിസൈനർ സന്തോഷ് രാമൻ, സംഗീതം ജേക്‌സ് ബിജോയ്, ചീഫ് പ്രൊഡക്ഷൻ കൺട്രോളർ സിദ്ധു പനയ്ക്കൽ, മേക്കപ്പ് ലിജു പനംകോഡ്, ബിജീഷ് ബാലകൃഷ്ണൻ, വസ്ത്രാലങ്കാരം മുരളി, ചീഫ് അസോസിയേറ്റ് ഡയറക്ടർ മനീഷ് ഭാർഗവൻ, സ്റ്റിൽസ് അനീഷ് ഉപാസനയും വഹിക്കുന്നു.
https://www.facebook.com/ActorMohanlal/posts/740631290763472
