കൗതുകകരമായ അവതരണവും ആശയവുമായി പുതിയ ചിത്രം ‘വയസ് എത്രയായി മുപ്പത്തി..?’. കോട്ടപ്പുറത്തെ കൂട്ടുകുടുംബം, മലബാറിൽ നിന്നൊരു മണിമാരൻ, ജ്വലനം, കരിങ്കണ്ണൻ എന്നീ ചിത്രങ്ങൾക്കു ശേഷം പപ്പൻ നരിപ്പറ്റ സംവിധാനം ചെയ്യുന്ന ചിത്രം കൂടിയാണ് ‘വയസ് എത്രയായി മുപ്പത്തി’. നോ ലിമിറ്റ്സിന്റെ ബാനറിൽ ഷിജു.യു.സി.യാണ് നിർമ്മാണം വഹിക്കുന്നത്.
വളരെ ആർഭാടമായി കല്യാണം നടത്തി വിവാഹബന്ധം പിരിഞ്ഞവരെ ശപിച്ചു കൊണ്ടും നാൽപ്പതു വയസ്സ് കഴിഞ്ഞിട്ടും പെണ്ണ് കിട്ടാത്തവർക്കു വേണ്ടി പ്രാർത്ഥിച്ചു കൊണ്ടുമാണ് ചിത്രം പറയുന്നത്. മലബാറിന്റെ പശ്ചാത്തലത്തിലൂടെ പുർണ്ണമായും നർമ്മത്തിലൂടെയാണ് ചിത്രം അവതരിപ്പിക്കുന്നത്.
പ്രശാന്ത് മുരളി, ഉണ്ണിരാജാ, നസീർ സംക്രാന്തി, രമ്യ സുരേഷ്, ആഭാസോ ജിത്, മഞ്ജു പത്രോസ്, എന്നിവരും വി ഫോർ കോമഡി ഷോയിലൂടെ ശ്രദ്ധേയരായ നാല് താരങ്ങളും ചിത്രത്തിൽ പ്രധാന വേഷത്തിലെത്തുന്നുണ്ട്. ഷിജു യു.സി.യുടെ കഥയ്ക്ക് ഫൈസൽ കാരങ്ങാട്ട് ആണ് തിരക്കഥ ചരിക്കുന്നത്. കൈതപ്രത്തിന്റെ വരികൾക്ക് ഷിബു സുകുമാരനാണ് ഈണം പകർന്നിരിക്കുന്നത്.
സമീർ ജിബ്രാൻ ഛായാഗ്രഹണവും കലാസംവിധാനം നാരായണൻ പന്തിക്കരയും നിർവ്വഹിക്കുന്നു. ചിത്രത്തിന്റെ ചിത്രീകരണം ജനുവരിയിൽ ആരംഭിക്കും. മേക്കപ്പ് -ജിത്തു പയ്യന്നൂർ, കോസ്റ്റ്യും – ഡിസൈൻ – ഇന്ദ്രൻസ് ജയൻ, പ്രൊഡക്ഷൻ ഡിസൈനർ -സുഗുണേഷ് കുറ്റിയിൽ, പ്രൊഡക്ഷൻ കൺട്രോളർ- പ്രേംകുമാർ പറമ്പത്ത്.
