പ്രേക്ഷകർ ഒന്നടങ്കം കാത്തിരിക്കുന്ന ഷാരൂഖ്-ദീപിക ചിത്രം പഠാനിലെ രണ്ടാം ഗാനവും പുറത്ത് വിടാനൊരുങ്ങി അണിയറ പ്രവർത്തകർ. നേരത്തെ ചിത്രത്തിന്റെ ആദ്യത്തെ ഗാനം എത്തിയിരുന്നു. വിവാദങ്ങളിലേയ്ക്ക് ഗാനം കൂപ്പു കുത്തിയതിന് തുടർന്നുള്ള വിമർശനങ്ങളും പ്രതിഷേധങ്ങളും കെട്ടടങ്ങും മുൻപേയാണ് അണിയറ പ്രവർത്തകർ രണ്ടാമത്തെ ഗാനവും പുറത്ത് വിട്ടത്.
ഗാനത്തിൽ നടി ദീപിക പദുകോൺ കാവി നിറത്തിലുള്ള ബിക്കിനി ധരിച്ചതിനെ തുടർന്നാണ് സംഘപരിവാർ പ്രതിഷേധവുമായി രംഗത്ത് എത്തിയത്. എന്നാൽ, അനാവശ്യ വിവാദങ്ങൾക്കുള്ള മറുപടിയെന്നോണമാണ് ചിത്രത്തിലെ രണ്ടാമത്തെ ഗാനവും പുറത്ത് വരുന്നത്. ഗാനത്തിനായി പ്രേക്ഷകരും കാത്തിരിക്കുകയാണ്. ഝൂമേ ജോ പഠാൻ എന്ന ഗാനം ഡിസംബർ 22 ന് പുറത്തിറങ്ങുമെന്ന് അധികൃതർ അറിയിച്ചു. ബഷറം രംഗിലേതുപോലെ ഷാരൂഖിനൊപ്പം ദീപിക പദുകോണും ഈ ഗാനത്തിലുമുണ്ട്.
ആക്ഷൻ ത്രില്ലർ ഗണത്തിൽ പെടുന്ന ചിത്രം സംവിധാനം ചെയ്യുന്നത് സിദ്ധാർഥ് ആനന്ദ് ആണ്. സലാം നമസ്‌തേ, അഞ്ജാന അഞ്ജാനി, ബാംഗ് ബാംഗ്, വാർ ഒക്കെ ഒരുക്കിയ സംവിധായകൻ. ദീപിക പദുകോൺ നായികയാവുന്ന ചിത്രത്തിൽ ജോൺ എബ്രഹാം മറ്റൊരു പ്രധാന കഥാപാത്രത്തെ അവതരിപ്പിക്കുന്നു.
ഡിംപിൾ കപാഡിയ, ഷാജി ചൗധരി, ഗൗതം, അഷുതോഷ് റാണ തുടങ്ങിയവരും പ്രധാന വേഷത്തിലെത്തുന്നുണ്ട്. ആക്ഷൻ രംഗങ്ങൾക്ക് ഏറെ പ്രാധാന്യമുള്ള ചിത്രത്തിനു വേണ്ടി ഷാരൂഖ് ഏറെ തയ്യാറെടുപ്പുകൾ നടത്തിയിരുന്നു. ഹിന്ദിക്ക് പുറമെ തമിഴ്, തെലുങ്ക് പതിപ്പുകളിലും പഠാൻ തിയറ്ററുകളിലെത്തും. 2023 ജനുവരി 25 ആണ് ചിത്രം പ്രേക്ഷകരിലേയ്ക്ക് എത്തുന്നത്.
