ഫോർബ്സ് മാസികയുടെ 2022ലെ മികച്ച ചിത്രങ്ങളുടെ പട്ടികയിൽ ഇടം നേടി മലയാളത്തിൽ നിന്ന് രണ്ട് ചിത്രങ്ങൾ. മമ്മൂട്ടി ചിത്രം റോഷാക്കും കുഞ്ചാക്കോ ബോബൻ ചിത്രം ന്നാ താൻ കേസ് കൊട് എന്നിവയാണ് മലയാളത്തിൽ നിന്ന് ഫോർബ്സ് പട്ടികയിൽ ഇടം നേടിയ ചിത്രങ്ങൾ.
ആർ. ആർ, ഗുഡ്ബൈ, ഗംഗുഭായ് കാത്യാവാഡി, ഡൗൺഫാൾ; ദ കേസ് എഗൈൻ്സ്റ്റ് ബോയ്ങ്ങ്, ഗാർഗി, ടിൻഡർ സ്വിൻഡ്ലർ, പ്രിസണേഴ്സ് ഓഫ് ഗോസ്റ്റ് ലാന്റ്, എവരി തിങ്ങ് എവരിവെയർ ആൾ അറ്റ് വൺ എന്നിവയാണ് പട്ടികയിലിടം നേടിയ മറ്റു ചിത്രങ്ങൾ. നിസ്സാം ബഷീറിന്റെ സംവിധാനത്തിൽ മമ്മൂട്ടിയെ നായകനാക്കി പുറത്തിറങ്ങിയ ചിത്രമാണ് റോഷാക്ക്.
വേറിട്ട പ്രമേയത്തിൽ എത്തിയ ചിത്രം മമ്മൂട്ടിയുടെ കമ്പനിയാണ് നിർമ്മിച്ചത്. ചിത്രത്തിൽ ബിന്ദു പണിക്കർ, ഗ്രേസ് ആന്റണി, ഷറഫുദ്ദീൻ, ജഗദീഷ്, സഞ്ജു ശിവറാം, കോട്ടയം നസീർ എന്നിവരാണ് മറ്റു പ്രധാന വേഷങ്ങളിലെത്തുന്നത്. കുഞ്ചാക്കോ ബോബനെ നായകനാക്കി രതീഷ് ബാലകൃഷ്ണ പൊതുവാൾ സംവിധാനം ചെയ്ത ചിത്രമാണ് ന്നാ താൻ കേസ് കൊട്. ആൻഡ്രോയിഡ് കുഞ്ഞപ്പൻ,കനകം കാമിനി കലഹം എന്നി ചിത്രങ്ങൾക്കു ശേഷം രതീഷ് പൊതുവാൾ തിരക്കഥയെഴുതി സംവിധാനം ചെയ്ത ചിത്രമാണിത്. ഗായത്രി ശങ്കറാണ് ചിത്രത്തിൽ നായികയായി എത്തിയത്.
