ലിജോ ജോസ് പെല്ലിശ്ശേരിയുടെ മമ്മൂട്ടിയെ നായകനാക്കി എത്തിയ ഏറ്റവും പുതിയ ചിത്രമായ ‘നൻപകൽ നേരത്ത് മയക്കം’ കഴിഞ്ഞ ദിവസം കേരള രാജ്യാന്തര ചലച്ചിത്ര മേളയിൽ പ്രദർശനത്തിന് എത്തിയിരുന്നു. ചിത്രം കാണാൻ തിയറ്റർ കവിഞ്ഞും ആൾക്കാരുണ്ടായിരുന്നത് ചിത്രത്തിന്റെ വിജയ കുതിപ്പ് കാണിക്കുകയാണ്. മേളയിൽ ഇതിനോടകം രണ്ട് തവണ ചിത്രം പ്രദർശിപ്പിച്ചപ്പോഴും അസാമാന്യ തിരക്കാണ് അനുഭവപ്പെട്ടത്.
നാളെ രാവിലെ 9.30ക്കും ചിത്രം പ്രദർശിപ്പിക്കും. ഇതിനുള്ള ബുക്കിംഗ് ഇന്ന് തന്നെ ഫുൾ ആയി കഴിഞ്ഞു. റിസർവേഷൻ ആരംഭിച്ച് മിനിറ്റുകൾക്കുള്ളിലാണ് നാളത്തെ ഷോയ്ക്കും പ്രേക്ഷകർ നിറഞ്ഞത്. ഇപ്പോൾ, ചിത്രത്തിന് ലഭിച്ച സ്വീകാര്യതയിൽ നന്ദി പറഞ്ഞ് രംഗത്ത് എത്തിയിരിക്കുകയാണ് ലിജോ ജോസ് പെല്ലിശ്ശേരി. ‘നൻപകൽ നേരത്ത്’ സിനിമാകൊട്ടകയും കവിഞ്ഞൊരുപാട് ദൂരം ഒഴുകിയ നിങ്ങളുടെ സ്‌നേഹം കണ്ടു, ഒരുപാടൊരുപാട് നന്ദി എന്ന് ലിജോ ജോസ് പെല്ലിശ്ശേരി കുറിച്ചത്.
പ്രേക്ഷക പങ്കാളിത്തം കൊണ്ട് അമ്പരിപ്പിക്കുന്ന കാഴ്ചയായിരുന്നു ‘നൻപകൽ നേരത്ത് മയക്ക’ത്തിന്റെ വേൾഡ് പ്രീമിയർ. അഭൂതപൂർവമായ തിക്കും തിരക്കുമാണ് ചിത്രം കാണാൻ ഉണ്ടായത്. കേരള രാജ്യാന്തര ചലച്ചിത്ര മേളയിലെ മത്സരവിഭാഗത്തിലായിരുന്നു ചിത്രം പ്രദർശിപ്പിച്ചത്. മമ്മൂട്ടി കമ്പനിയുടെ ബാനറിലുള്ള ആദ്യത്തെ ചിത്രം കൂടിയാണ് ‘നൻപകൽ നേരത്ത് മയക്കം’.
മമ്മൂട്ടിക്ക് പുറമേ അശോകൻ, രമ്യാ പാണ്ഡ്യൻ, കൈനകരി തങ്കരാജ്, ടി സുരേഷ് ബാബു, ചേതൻ ജയലാൽ, അശ്വത് അശോക്കുമാർ, സഞ്ജന ദിപു തുടങ്ങിയവരും ചിത്രത്തിൽ വേഷമിട്ടു. തേനി ഈശ്വർ ആണ് ചിത്രത്തിന്റെ ഛായാഗ്രാഹണം നിർവഹിച്ചത്. എസ് ഹരീഷിന്റേതാണ് തിരക്കഥ.
https://www.facebook.com/lijojosepellissery/posts/pfbid0226qrLqUAX9PPba1ErofzYtcHx1ZEJ5s6qyyR69ee7MEBbrfFQvvXJtAE3B9crgDTl
