നടൻ ശ്രീനിവാസൻ്റെ ഏറ്റവും പുതിയ ചിത്രങ്ങൾ പങ്കുവെച്ച് സംവിധായകൻ സത്യൻ അന്തിക്കാട്. കൂടാതെ രോഗാവസ്ഥയിൽ നിന്ന് പൂർണ്ണമായും മുക്തനായ ശേഷമുള്ള ആരോഗ്യത്തെ കുറിച്ചും അദ്ദേഹം കുറിക്കുന്നുണ്ട്. നടൻ, ഇപ്പോൾ അഭിനയിച്ചുകൊണ്ടിരിക്കുന്ന കുറുക്കൻ സിനിമയുടെ ലൊക്കേഷനിലെത്തിയാണ് സത്യൻ അന്തിക്കാട് ശ്രീനിവാസനെ കണ്ടത്.
കൂടുതൽ സന്തോഷവാനായും ആരോഗ്യവാനായുമാണ് ശ്രീനിയെ കാണാൻ കഴിഞ്ഞതെന്ന് സത്യൻ അന്തിക്കാട് പറയുന്നു. ‘ശ്രീനിവാസൻ്റെ മൂർച്ചയുള്ള സംഭാഷണങ്ങളും പൊട്ടിച്ചിരിപ്പിക്കുന്ന തമാശകളും ഇനിയുമുണ്ടാകും. പവിഴമല്ലി വീണ്ടും പൂത്തുലയും’ പ്രതീക്ഷിച്ചതിനേക്കാൾ വേഗത്തിൽ അതു സംഭവിക്കുന്നുവെന്നും സത്യൻ അന്തിക്കാട് കുറിച്ചു.
കുറിപ്പ് ;
മഴവിൽ മനോരമയുടെ പുരസ്‌കാരം സ്വീകരിച്ചുകൊണ്ട് നിറഞ്ഞ സദസ്സിനോട് ശ്രീനിവാസൻ പറഞ്ഞു-
‘ഞാൻ രോഗശയ്യയിലായിരുന്നു.
അല്ല, രോഗിയായ ഞാൻ ശയ്യയിലായിരുന്നു.’
ഉറവ വറ്റാത്ത നർമ്മത്തിൻ്റെ ഉടമയെ ചേർത്തു പിടിച്ച് ഞാൻ പറഞ്ഞു,
‘ശ്രീനിവാസൻ്റെ മൂർച്ചയുള്ള സംഭാഷണങ്ങളും പൊട്ടിച്ചിരിപ്പിക്കുന്ന തമാശകളും ഇനിയുമുണ്ടാകും. പവിഴമല്ലി വീണ്ടും പൂത്തുലയും’
പ്രതീക്ഷിച്ചതിനേക്കാൾ വേഗത്തിൽ അതു സംഭവിക്കുന്നു.
രണ്ടു ദിവസം മുമ്പ് ശ്രീനി അഭിനയിക്കുന്ന’കുറുക്കൻ’ എന്ന സിനിമയുടെ സെറ്റിൽ ഞാൻ പോയി. ശ്രീനി പഴയ ശ്രീനിയായി മാറി;എല്ലാ അർത്ഥത്തിലും.
നന്ദി പറയേണ്ടത് പുതിയ സിനിമയുടെ ശിൽപികളോടും വിനീതിനോടും ഒരു നിമിഷംപോലും അരികിൽനിന്നു മാറി നിൽക്കാത്ത ശ്രീനിയുടെ സ്വന്തം വിമലയോടുമാണ്.
സ്‌നേഹമുള്ളവരുടെ പ്രാർത്ഥനകൾക്ക് ഫലമുണ്ടാകുമെന്ന് ഇനി വിശ്വസിച്ചേ പറ്റു.
https://www.facebook.com/sathyan.anthikad.official/posts/pfbid02RENaKQkyLa7dm48yLgCgau3wQqNnug5okSU2QSJARwrFajWNoTpjR1hQzp4B1Wtnl
