ഒരു കാലത്ത് മലയാള സിനിമാ ലോകം അടക്കി വാണിരുന്ന നടീ-നടന്മാർ വീണ്ടും സിനിമയിലേയ്ക്ക് എത്തുന്നത് എന്നും പ്രേക്ഷകർക്ക് പ്രിയപ്പെട്ട ഒന്നാണ്. അത്തരത്തിൽ ഒരുപാട് താരങ്ങൾ തങ്ങളുടെ മടങ്ങി വരവ് പ്രഖ്യാപിച്ചിരുന്നു. ഇതിൽ ഏറ്റും ഊർജ്ജസ്വലതയോടെയുള്ള ഒരു വരവ് പ്രേക്ഷകർ ആഗ്രഹിക്കുന്നുവെങ്കിൽ അത്, മറ്റാരുമല്ല പ്രേക്ഷകരെ പൊട്ടിച്ചിരിപ്പിച്ച കേരളത്തിൻ്റെ സ്വന്തം ഹാസ്യ സാമ്രാട്ട് ജഗതീ ശ്രീകുമാറിന്റേതാണ്.
2012 മാർച്ചിൽ മലപ്പുറം തേഞ്ഞിപ്പലത്ത് വച്ചുണ്ടായ വാഹനാപകടത്തെ തുടർന്നാണ് ജഗതി അഭിനയരംഗത്തുനിന്ന് പിൻവാങ്ങിയത്. അപകടത്തിൽ ഗുരുതരമായി പരിക്കേറ്റ അദ്ദേഹം വർഷങ്ങൾ നീണ്ട ചികിത്സയിലൂടെയാണ് ജീവിതത്തിലേക്ക് മടങ്ങിവന്നത്. ആരോഗ്യം അൽപ്പം ഭേദമായതിന് പിന്നാലെ സി.ബി.ഐ 5 എന്ന ചിത്രത്തിൽ തൻ്റെ പ്രശസ്തമായ വിക്രം എന്ന കഥാപാത്രത്തെ അവതരിപ്പിച്ച് സിനിമയിലേക്ക് ജഗതി തിരിച്ചുവരവ് നടത്തിയിരുന്നു.
ഇത് പ്രേക്ഷകരും ഇരുകൈയും നീട്ടി സ്വീകരിച്ചിരുന്നു. തങ്ങളുടെ പഴയ ജഗതിയേട്ടനെ എന്ന് തിരികെ ലഭിക്കും എന്ന ചോദ്യത്തിനിടെ പുത്തൻ പ്രതീക്ഷ നൽകുന്ന ഒരു വീഡിയോ ആണ് ഇപ്പോൾ സോഷ്യൽമീഡിയയിൽ നിറയുന്നത്. മകൾ പാർവതിക്കൊപ്പം ഗാനമാലപിക്കുകയാണ് ജഗതി.
മുഹമ്മദ് റഫിയുടെ ക്യാ ഹുവാ തേരാ വാദാ എന്ന ഗാനമാണ് ഇരുവരും ചേർന്ന് ആലപിക്കുന്നത്. പാട്ടുപാടാം എന്ന് മകൾ ചോദിക്കുമ്പോൾ ആവാം എന്ന് പറയുന്ന ജഗതി ശ്രീകുമാറിനെയാണ് വീഡിയോയുടെ തുടക്കത്തിൽ കാണാനാവുക. പിന്നീട് മകൾക്കൊപ്പം പാട്ടിൻ്റെ വരികൾ മൂളാൻ ശ്രമിക്കുന്നു. പൂർവ്വാധികം ശക്തിയോടെ അഭിനയ വിസ്മയം തിരികെ വരുമെന്ന പ്രതീക്ഷയിലാണ് ആരാധകർ ഇപ്പോൾ.
https://www.facebook.com/jagathysreekumarofficial/videos/479233944080023/
