നടൻ ആസിഫ് അലി കേന്ദ്രകഥാപാത്രത്തിലെത്തിയ ചിത്രമാണ് കൂമൻ. പ്രേക്ഷക ശ്രദ്ധ നേടി ചിത്രം പ്രദർശനം തുടരുകയാണ്. ചിത്രത്തെ സിനിമാ ലോകത്ത് അകത്തും പുറത്തും നിരവധി പേർ അഭിനന്ദിച്ച് രംഗത്ത് വന്നിരുന്നു. ഇപ്പോൾ കൂമനെ പ്രശംസിച്ച് സംവിധായകൻ ഷാജി കൈലാസും രംഗത്തെത്തി. ഫേസ്ബുക്കിലൂടെയാണ് അഭിനന്ദനം അറിയിച്ചത്.
ചിത്രം സമ്മാനിച്ചത് മികച്ച ദൃശ്യാനുഭവമാണെന്ന് ഷാജി കൈലാസ് പറയുന്നു. ആദ്യാവസാനം ത്രില്ലടിപ്പിച്ച ഒരു ചിത്രമെന്ന് കൂമനെ വിശേഷിപ്പിക്കാം. ജീത്തു ജോസഫ് ഒരിക്കൽ കൂടി തന്റെ കയ്യടക്കം കൊണ്ട് ഞെട്ടിച്ചു. ആസിഫ് അലി തന്നത് തന്റെ കരിയറിലെ തന്നെ മികച്ച പ്രകടനങ്ങളിലൊന്നാണെന്നും ഷാജി കൈലാസ് കുറിച്ചു.
ദൃശ്യം 2, 12th മാൻ എന്നീ ചിത്രങ്ങൾക്ക് ശേഷം ജിത്തു ജോസഫ് സംവിധാനം ചെയ്ത ചിത്രമാണ് കൂമൻ. മാജിക്ക് ഫ്രെയിംസിന്റെ ബാനറിൽ ലിസ്റ്റിൻ സ്റ്റീഫൻ, അനന്യ ഫിലിംസിന്റെ ബാനറിൽ ആൽവിൻ ആന്റണി എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. കെ ആർ കൃഷ്ണകുമാറാണ് കൂമന്റെ രചന. രൺജി പണിക്കർ, ബാബുരാജ്, മേഘനാഥൻ, ഹന്നാ രാജികോശി, ആദം അയൂബ്, ബൈജു, ജാഫർ ഇടുക്കി, പൗളി വിൽസൺ, കരാട്ടേ കാർത്തിക്, ജോർജ്ജ് മരിയൻ, രമേശ് തിലക്, പ്രശാന്ത് മുരളി, അഭിരാം രാധാകൃഷ്ണൻ, രാജേഷ് പറവൂർ, ദീപക് പറമ്പോൽ, ജയിംസ് ഏലിയ, വിനോദ് ബോസ്, പ്രദീപ് പരസ്പരം, റിയാസ് നർമ്മകല തുടങ്ങിയവരാണ് ചിത്രത്തിലെത്തിയ മറ്റ് താരങ്ങൾ.
