ഇന്ത്യന്‍ സിനിമയിലെ ബ്രഹ്മാണ്ഡ സംവിധായകന്‍ ശങ്കറും ഉലകനായകന്‍ കമല്‍ഹാസനും ഒന്നിക്കുന്ന ഇന്ത്യൻ 2വിൻ്റെ ഫസ്റ്റ്ലുക്ക് പുറത്ത് വിട്ടു. നടൻ്റെ പിറന്നാൾ ദിനത്തോട് അനുബന്ധിച്ചാണ് അണിയറ പ്രവർത്തകർ ചിത്രത്തിലെ നടൻ്റെ ലുക്ക്‌ റിലീസ് ചെയ്തത്.
സേനാപതിയായിട്ടാണ് കമൽ എത്തുന്നത്. കാജൽ അഗർവാൾ ആണ് ഇന്ത്യൻ 2വില്‍ നായിക. രാകുൽ പ്രീത്, സിദ്ധാർഥ് എന്നിവരാണ് മറ്റുതാരങ്ങൾ. 200 കോടിയാണ് സിനിമയുടെ തുടർഭാഗത്തിൻ്റെ ബജറ്റ്. സാബു സിറിള്‍, പീറ്റര്‍ ഹെയ്ന്‍, രവിവര്‍മന്‍ തുടങ്ങിയ പ്രമുഖര്‍ ആണ് ഇന്ത്യന്‍ 2വിൻ്റെ സാങ്കേതിക വിദഗ്ധർ. നിർമാണം ലൈക പ്രൊഡക്‌ഷൻസ്.
അഴിമതിക്കെതിരെ പോരാടുന്ന ഇന്ത്യന്‍ എന്ന കഥാപാത്രമായി കമല്ഹാസന് തകര്‍ത്തഭിനയിച്ച ‘ഇന്ത്യന്‍’ 1996ലാണ് പ്രദര്‍ശനത്തിനെത്തിയത്. ചിത്രത്തില്‍ ഇരട്ടവേഷത്തില്‍ ആണ് കമൽ അഭിനയിച്ചത്. ഇന്നും ഈ ചിത്രം നെഞ്ചിൽ കൊണ്ട് നടക്കുന്ന പ്രേക്ഷകർ ഉണ്ടെന്നത് ഈ ചിത്രത്തിൻ്റെ വിജയത്തെ ചൂണ്ടിക്കാണിക്കുന്നു.
ഈ ചിത്രത്തിൽ കമല്ഹാസന് മികച്ച നടനുള്ള ദേശീയ പുരസ്കാരവും ലഭിച്ചിരുന്നു. ‘ഇന്ത്യൻ’ സിനിമയുടെ ക്ലൈമാക്സ് രംഗം ആ സിനിമയ്ക്ക് ഒരു തുടര്‍ച്ചയുണ്ടാകുമെന്ന സൂചന നല്‍കിയിരുന്നു.
