ചിരിപ്പിച്ചും ചിന്തിപ്പിച്ചും നിറഞ്ഞ സദസിൽ പ്രദർശനം തുടരുകയാണ് ജയ ജയ ജയ ജയ ഹേ എന്ന ചിത്രം. നടൻ ബേസിൽ ജോസഫും നടി ദർശന രാജേന്ദ്രനും കേന്ദ്രകഥാപാത്രങ്ങളായി എത്തിയ ചിത്രം വിജയകൊടി നാട്ടി മുന്നേറുകയാണ്. കുടുംബത്തിലെ മുതിർന്നവരുടെ വാക്കുകളെ അക്ഷരം പ്രതി അനുസരിച്ച് സ്വന്തം ഇഷ്ടങ്ങൾ മൂടിവെച്ച് വീർപ്പുമുട്ടി ജീവിക്കുന്ന ജയലളിതയുടെ ജീവിതമാണ് ചിത്രത്തിലൂടെ വരച്ചുകാണിക്കുന്നത്.
ജയലളിത എന്ന ജയയെ അവതരിപ്പിച്ചത് നടി ദർശനയാണ്. രാജ്ഭവനിലെ രാജേഷിനെ അവതരിപ്പിച്ചത് ബേസിൽ ജോസഫും. രാജേഷിൻ്റെ ഭാര്യയായി എത്തുന്ന ജയയിലെ അപ്രതീക്ഷിത മാറ്റങ്ങളാണ് ചിത്രത്തിൻ്റെ കാതൽ. എന്നാൽ ഈ ചിത്രത്തിൽ ഏറെ ചർച്ചയാകുന്ന ഒരു മുഖമുണ്ട്. അത് മറ്റാരുടെയും അല്ല. രാജേഷ് എന്ന കഥാപാത്രത്തിൻ്റെ അമ്മ വേഷത്തിലെത്തുന്ന നടി കനകം ആണ്. ഇപ്പോൾ ഈ മുഖത്തെ ആരാധകർക്കായി പരിചയപ്പെടുത്തുകയാണ് നടൻ ബേസിൽ ജോസഫ്.
വൈകി കിട്ടിയ കനകം എന്നാണ് കുടശ്ശനാട് കനകത്തെ ബേസിൽ അഭിസംബോധന ചെയ്തത്. ചിത്രത്തിൽ കാഴ്ച വെച്ച അഭിനയം പടം കണ്ടിറങ്ങിയ പ്രേക്ഷകരുടെ മനസിൽ തങ്ങി നിൽക്കുന്നുണ്ട്. ഇതാണ് കനകം എന്ന അഭിനേത്രിയുടെ വിജയവും. രാജേഷിൻ്റെ അമ്മ അത്രത്തോളം പ്രേക്ഷകരുടെ മനസിലേയ്ക്ക് ആഴത്തിൽ പതിഞ്ഞുവെന്ന് ഈ ഒറ്റ ചിത്രത്തിലൂടെ മനസിലാക്കാൻ സാധിക്കും.
