“ജോർജ്ജെ മനോജിൻ്റെ നമ്പർ വാങ്ങിച്ചോളൂ” ഇങ്ങനെ പറഞ്ഞപ്പോൾ എൻ്റെ സന്തോഷം പറഞ്ഞറിയിക്കാൻ വയ്യ; മനോജിൻ്റെ കുറിപ്പ്

തിങ്കളാഴ്ച നിശ്ചയം എന്ന ഹിറ്റ്‌ ചിത്രം കാണാത്ത മലയാളികൾ വിരളമായിരിക്കും. ചിത്രത്തിൽ ഏറ്റവും ശ്രദ്ധ നേടിയത് ചിത്രത്തിൽ അച്ഛൻ്റെ വേഷം അതിഗംഭീരമായി അവതരിപ്പിച്ച നടൻ മനോജ്‌ കെയു തന്നെയാണ്. ഇപ്പോൾ നടൻ മമ്മൂട്ടിയെ കണ്ടതും സംസാരിച്ചതുമായ സന്തോഷം പങ്കുവെച്ചിരിക്കുകയാണ് നടൻ. ഫേസ്ബുക് പോസ്റ്റിലൂടെയാണ് ജീവിതത്തിൽ മറക്കാൻ കഴിയാത്ത ഏട് താരം പങ്കിട്ടത്.

കുറിപ്പ് :

എൻ്റെ ജീവിതത്തിലെ ഏറ്റവും മനോഹരമായ ഒരു നിമിഷത്തെക്കുറിച്ച് നിങ്ങളുമായി പങ്ക് വെക്കാൻ ആഗ്രഹിക്കുന്നു. . കഴിഞ്ഞ ദിവസങ്ങളിൽ ഏറണാകുളം ലാൽ മീഡിയയിൽ “പ്രണയ വിലാസം ” എന്ന എൻ്റെ പുതിയ സിനിമയുടെ ഡബ്ബിങ്ങ് ആയിരുന്നു. ആദ്യ ദിനം ഡബ്ബിങ് കഴിഞ്ഞ് പിറ്റേന്ന് സ്റ്റുഡിയോയിലെത്തിയപ്പോൾ എല്ലാവരും ആരെയോ ബഹുമാനപൂർവ്വം കാത്തിരിക്കുന്ന ഒരു പ്രതീതി…
കാര്യം തിരക്കിയപ്പോൾ സന്തോഷപൂർവ്വം അറിയുന്നു സാക്ഷാൽ മമ്മൂക്ക ഡബ്ബിംഗിനായി വരുന്നു എന്ന്, സ്റ്റുഡിയോ സ്റ്റാഫ് എന്നോട് പറഞ്ഞു ” സത്യം പറയാലൊ കേട്ടയുടനെ എൻ്റെ “കിളി ” പോയി. പിന്നെ മമ്മൂക്കയെ കാണാനുള്ള ധൃതിയായ് . മമ്മൂക്ക വരുമ്പോൾ എന്നെ അറിയിക്കണേ എന്ന് സ്റ്റാഫിൽ ഒരാളെ സ്നേഹപൂർവ്വം ഏല്പിച്ച് ഞാൻ ഡബ്ബിങ് തുടർന്നു. ഇടയിലെപ്പോഴോ അയാൾ വന്ന് പറഞ്ഞു ” മമ്മൂക്ക ഡബ്ബിങ് കഴിഞ്ഞ് പുറത്തേക്കിറങ്ങാറായി. ഞാൻ ഉടൻ പുറത്തേക്ക് ഓടി . നിമിഷങ്ങൾക്കുള്ളിൽ മമ്മൂക്ക പുറത്തേക്ക് വരുന്നു. “നെറ്റിപട്ടം കെട്ടിയ ആന” എന്നൊക്കെ പറയാറില്ലെ … . ഞാൻ മെല്ലെ അടുത്ത് ചെന്നു ധൈര്യം സംഭരിച്ച് പറയുവാനൊരുങ്ങി. “മമ്മൂക്ക ഞാൻ ” തിങ്കളാഴ്ച നിശ്ചയം ” പറഞ്ഞ് മുഴുപ്പിക്കാൻ വിടാതെ മമ്മൂക്ക പറഞ്ഞു…”ആ… മനസ്സിലായി കുവൈത്ത് വിജയൻ …. സിനിമയിൽ കണ്ടത് പോലെ അല്ല … കാണാൻ ചെറുപ്പമാണല്ലോ… വിജയനെ പോലെ ചൂടാവുന്ന ആളാണെന്ന് പറയില്ലല്ലോ…
എന്താ background മുമ്പ് അഭിനയിച്ചിട്ടുണ്ടോ?”
ഞാൻ പറഞ്ഞു തീയ്യറ്ററാണ് പിന്നെ കുറച്ച് സിനിമകളിൽ ചെറിയ ചെറിയ വേഷങ്ങളിൽ …..
“ഖസാക്കിൻ്റെ ഇതിഹാസം” നാടകത്തിലുണ്ടായിരുന്നു. മമ്മൂക്ക ഏറണാകുളത്ത് വെച്ച് നാടകം കണ്ടിരുന്നു. പിന്നീട് നാടകത്തെ കുറിച്ചും സിനിമയെ കുറിച്ചും സംസാരിക്കുകയും ചെയ്തു. ഒടുവിൽ ഞാൻ പറഞ്ഞു ” മമ്മൂക്ക ഒരു ഫോട്ടോ ……..”
വെളിയിൽ നിന്നെടുക്കാം ഇവിടെ light കുറവാണ്.
അങ്ങനെ സന്തോഷത്തോടെ മമ്മൂക്ക എനിക്ക് വേണ്ടി ഈ ഫോട്ടോയ്ക്ക് നിന്ന് തന്നു.
പോകാനിറങ്ങുമ്പോൾ “പ്രിയൻ ഓട്ടത്തിലാണ് ” എന്ന സിനിമയിൽ മമ്മൂക്ക പറഞ്ഞത് പോലെ ഒരു ഡയലോഗും
” ജോർജ്ജെ മനോജിൻ്റെ നമ്പർ വാങ്ങിച്ചോളൂ.”
എൻ്റെ സന്തോഷം പറഞ്ഞറിയിക്കാൻ വയ്യ…
തൊണ്ടയിലെ വെള്ളവും വറ്റി…
നേരെ ക്യാബിനിൽ ചെന്ന് ഒരു കുപ്പി വെള്ളം മൊത്തം കുടിച്ചു. പോയ “കിളി” തിരിച്ച് വരാൻ വീണ്ടും സമയമെടുത്തു. ” മനോജേട്ടാ… നോക്കാം ” ക്യാബിനിൽ നിന്ന് വീണ്ടും വിളി …. ഡബിങ് തുടരുമ്പോഴും ഉള്ളിൽ സന്തോഷവും … ആരാധനയും കൂടി… കൂടി വന്നു.
Thank you മമ്മൂക്കാ……….