ബർമൂഡയുടെ ഫസ്റ്റ്ലുക്ക് പോസ്റ്റർ സോഷ്യൽ മീഡിയവഴി നടൻ മമ്മൂട്ടി റിലീസ് ചെയ്തു. ഷെയ്ൻ നിഗം നായകനാകുന്ന ബർമൂഡയുടെ സംവിധാനം ടി.കെ.രാജീവ് കുമാറാണ്. വളരെ വ്യതസ്തമായ പോസ്റ്ററിന്റെ സബ്ടൈറ്റിൽ കാണാതായ ദുരൂഹതയെന്നാണ്. ചിരിച്ചു കൊണ്ട് വെള്ളത്തിൽ കിടക്കുന്ന ഷെയ്ൻ ആണ് ഫസ്റ്റ് ലുക്ക് പോസ്റ്ററിൽ. 24 ഫ്രെയിംസിൻ്റെ ബാനറിൽ സൂരജ് സി.കെ, ബിജു സി.ജെ, ബാദുഷ എൻ.എം എന്നിവർ ചേർന്നാണ് ചിത്രം നിർമ്മിക്കുന്നത്.
കാശ്മീരിയായ ശെയ്ലീ കൃഷ്ണയാണ് ചിത്രത്തിൽ ഷെയ്ൻ നിഗമിന്റെ നായികയായെത്തുന്നത്. കൂടാതെ വിനയ് ഫോർട്ട്, ഹരീഷ് കണാരൻ, സൈജു കുറുപ്പ്, സുധീർ കരമന, മണിയൻപിള്ള രാജു, ഇന്ദ്രൻസ്, സാജൻ സുധർശൻ, ദിനേഷ് പണിക്കർ,കോട്ടയം നസീർ,ശ്രീകാന്ത് മുരളി, നന്ദു, നിരഞ്ജന അനൂപ്, ഗൗരി നന്ദ, നൂറിൻ ഷെറീഫ്, ഷൈനി സാറ തുടങ്ങി വൻ താരനിര തന്നെ ചിത്രത്തിൽ അണിനിരക്കുന്നു. ബർമൂഡയെന്ന ഹാസ്യ ചിത്രത്തിന്റെ രചന നിർവഹിച്ചിരിക്കുന്നത് നവാഗതനായ കൃഷ്ണദാസ് പങ്കിയാണ്.
