ആലപ്പുഴയിലെ തകഴിയിൽ കർഷകൻ ആത്മഹത്യ ചെയ്ത സംഭവം ഏറ്റവും വേദനാജനകമാണ്. അദ്ദേഹംതന്നെ പറഞ്ഞതുപ്രകാരം തുടർകൃഷിക്ക്‌ ബാങ്കുകൾ വായ്പ നിഷേധിച്ചത് മൂലുണ്ടായ പ്രയാസമാണ് ആത്മഹത്യക്കു കാരണം. രാജ്യത്താകമാനം കർഷകർ തീരാദുരിതത്തിലാണ്. കേന്ദ്രസർക്കാർ കൈക്കൊണ്ടുവരുന്ന ഉദാരവൽക്കരണനയങ്ങൾ കുത്തകകൾക്കും ഇടനിലക്കാർക്കും ഗുണം ചെയ്യുകയും കർഷകരെ ദ്രോഹിക്കുകയും ചെയ്യുന്നതാണ്. ഇതിൽനിന്ന് വ്യത്യസ്തമായി കർഷകർ ഉൾപ്പെടെ എല്ലാ ജനവിഭാഗങ്ങളെയും ചേർത്തുപിടിക്കുന്ന ജനപക്ഷസർക്കാരാണ് കേരളത്തിലേത്. അതുകൊണ്ടുതന്നെ കേരളത്തിലുണ്ടായ ഈ സംഭവം പ്രത്യേക ശ്രദ്ധ അർഹിക്കുന്നു എന്നതിൽ സംശയമില്ല.
മരിച്ച കർഷകൻ്റെ പേരിൽ പ്രചരിക്കുന്ന ആത്മഹത്യാക്കുറിപ്പ് പ്രകാരം അദ്ദേഹം 2011ൽ സ്റ്റേറ്റ് ബാങ്ക് ഓഫ് ഇന്ത്യയിൽനിന്നെടുത്ത കാർഷികവായ്പ 2020ൽ പലിശയും പിഴപ്പലിശയും ഒഴിവാക്കി ഒറ്റത്തവണ തീർപ്പാക്കിയതുകൊണ്ട് അയാളുടെ സിബിൽസ്കോറിനെ ബാധിക്കുകയും അതുകൊണ്ട് പിന്നീട് ബാങ്കുകൾ ഒന്നുംതന്നെ വായ്പ നൽകാതിരിക്കുകയും ചെയ്യുന്നു എന്നുപറയുന്നു. ഇതുമൂലമുണ്ടായ പ്രയാസമാണ് ഈ കർഷകൻ്റെ ആത്മഹത്യയിലേക്ക്‌ നയിച്ചതെന്ന് അദ്ദേഹത്തിൻ്റെയും ഭാര്യയുടെയും സത്യസന്ധമായ വെളിപ്പെടുത്തലുകളിൽനിന്ന് വ്യക്തവുമാണ്. എന്നാൽ, എല്ലാക്കാലത്തും കർഷകവഞ്ചനയുടെ നിലപാട് സ്വീകരിച്ച കേരളത്തിലെ പ്രതിപക്ഷം സത്യം മൂടിവച്ച് ഹീനമായ രാഷ്ട്രീയപ്രചാരണത്തിന്റെ ആയുധമാക്കി ഇതു മാറ്റിയിരിക്കുന്നു.
ഇപ്പോൾ മരണപ്പെട്ട കർഷകനിൽനിന്ന് 2021––22 കാലയളവിൽ സംഭരിച്ച നെല്ലിൻ്റെ വില പിആർഎസ് വായ്പയായി ഫെഡറൽ ബാങ്ക് വഴി നൽകുകയും സപ്ലൈകോ അത് സമയബന്ധിതമായി അടച്ചുതീർക്കുകയും ചെയ്തിട്ടുള്ളതാണ്. 2022––23 സീസണിലെ ഒന്നാംവിളയായി ഇദ്ദേഹത്തിൽനിന്ന്‌ സംഭരിച്ച 4896 കിലോഗ്രാം നെല്ലിന്റെ വിലയായി 1,38,655 രൂപ കേരള ബാങ്ക് വഴി പിആർഎസ് വായ്പയായി നൽകിയിട്ടുണ്ട്. ഇതിന്റെ തിരിച്ചടവിന്റെ സമയപരിധി വരാനിരിക്കുന്നതേയുള്ളൂ. ആയതിനാൽ പിആർഎസ് വായ്പ കർഷകന്റെ സിബിൽ സ്കോറിനെ ബാധിച്ചിട്ടില്ലെന്ന് മനസ്സിലാക്കാം. എന്നാൽ, നെല്ല് സംഭരണവില ലഭിക്കുന്നതിന് പിആർഎസ് വായ്പ എടുക്കേണ്ടി വന്നതാണ് ആ കർഷകനുണ്ടായ ദുരന്തത്തിന് കാരണമെന്ന് പ്രചരിപ്പിക്കുകയും കേരളത്തിലെ ജനപക്ഷ സർക്കാരിനെ താറടിക്കുന്നതിനുള്ള സുവർണാവസരമായി ഇതിനെ ഉപയോഗപ്പെടുത്തുകയും ചെയ്യുകയാണ് ഒരു വിഭാഗം. ഇവരുടെ കുടില പരിശ്രമങ്ങളെ വസ്തുതകളുടെയും സത്യത്തിന്റെയും പിൻബലത്തോടെ പ്രതിരോധിക്കേണ്ടിയിരിക്കുന്നു.
നെല്ല്സംഭരണവില വായ്പയാക്കുന്നതെന്തിന്
നെല്ല്സംഭരണവില യഥാസമയം നൽകാൻ ഏർപ്പെടുത്തിയ പിആർഎസ് വായ്പാ പദ്ധതിയെയാണ് വില്ലനായി ഒരു വിഭാഗം മാധ്യമങ്ങളും പ്രതിപക്ഷവും ചിത്രീകരിക്കുന്നത്.
വികേന്ദ്രീകൃത -ധാന്യ-സംഭരണ -സംസ്കരണ -വിതരണ പദ്ധതി ഒരു കേന്ദ്രാവിഷ്കൃത പദ്ധതിയാണ്. രാജ്യത്ത് ഉൽപ്പാദിപ്പിക്കുന്ന ഭക്ഷ്യധാന്യം താങ്ങുവില നൽകി കർഷകരിൽനിന്ന് സംഭരിക്കുകയും ഫുഡ് കോർപറേഷൻ ഓഫ് ഇന്ത്യയുടെ ഗോഡൗണുകളിൽ സൂക്ഷിക്കുകയും സംസ്ഥാനങ്ങൾക്ക് വിഹിതം അനുവദിച്ച് പൊതുവിതരണ സംവിധാനം വഴിയും മറ്റ് വിധത്തിലും വിതരണം ചെയ്യുകയും ചെയ്യുന്നത് കേന്ദ്രസർക്കാരിന്റെ നിയന്ത്രണത്തിലും മാർഗനിർദേശങ്ങൾ പ്രകാരവുമാണ്. സംഭരിക്കുന്ന നെല്ല് അരിയാക്കി പൊതുവിതരണ സമ്പ്രദായംവഴി ഗുണഭോക്താക്കൾക്ക് വിതരണം ചെയ്യുകയോ കേന്ദ്രപൂളിലേക്ക്‌ നൽകി എഫ്സിഐയ്ക്ക് കൈമാറുകയോ ചെയ്യാം. കേരളം കർഷകർ ഉൽപ്പാദിപ്പിക്കുന്ന മുഴുവൻ നെല്ലും സംഭരിക്കുകയും സംസ്കരിച്ച് അരിയാക്കി റേഷൻകടകൾ വഴി വിതരണം ചെയ്യുകയും ചെയ്യുന്നു. സംസ്ഥാനത്തിന്റെ ഭക്ഷ്യവിഹിതമായ 14.25 ലക്ഷം മെട്രിക് ടണ്ണിൽ, നാലേകാൽ ലക്ഷത്തിലധികം വരുന്ന ഇപ്രകാരം സംസ്ഥാനത്ത് ഉൽപ്പാദിപ്പിക്കുന്ന കുത്തരി കഴിച്ച് ബാക്കിയാണ് എഫ്സിഐയിൽനിന്ന് വിട്ടെടുക്കുന്നത്. നെല്ല് കുത്തി അരിയാക്കി റേഷൻകടകൾ വഴി ഗുണഭോക്താവിന്റെ വിരലടയാളം പതിപ്പിച്ച് വിതരണം പൂർത്തിയായ കാര്യം അന്നവിതരൺ പോർട്ടലിൽ യന്ത്രസംവിധാനത്തിലൂടെ അപ്‌ലോഡ് ചെയ്യപ്പെട്ടതിനുശേഷമേ നെല്ലിന്റെ താങ്ങുവിലയും അനുബന്ധചെലവുകളും ലഭിക്കാനുള്ള ക്ലെയിം കേന്ദ്രത്തിലേക്ക് സമർപ്പിക്കാൻ പോലും കഴിയുകയുള്ളൂ. ഈ പ്രക്രിയ പൂർത്തിയാകാൻ സാധാരണഗതിയിൽ ആറുമാസംവരെ സമയം എടുക്കാറുണ്ട്. പലരും പ്രചരിപ്പിക്കുന്നതുപോലെ ധാന്യം സംഭരിച്ചാലുടൻ പണം നൽകുന്നതല്ല ഈ പദ്ധതി.
പിആർഎസ് വായ്പ അപരാധമോ
മേൽപ്പറഞ്ഞ സാഹചര്യത്തിൽ താങ്ങുവില അനുവദിച്ചു കിട്ടുന്നതുവരെയും കാത്തിരിക്കാൻ കർഷകനോട് പറയുകയല്ല കേരള സർക്കാർ ചെയ്തത്. നെല്ല് അളന്നെടുത്താലുടനെ പണം നൽകാൻ കഴിയുന്ന ബദൽമാർഗം ആവിഷ്കരിക്കുകയാണ്. അതാണ് പിആർഎസ് വായ്പ പദ്ധതി. സംഭരിച്ച നെല്ലിന്റെ രസീതായ പാഡി റസീപ്റ്റ് ഷീറ്റ് ബാങ്കുകൾക്ക് കൈമാറി മറ്റ് ഈടൊന്നും കൂടാതെ വായ്പ അനുവദിക്കുകയാണ് ചെയ്യുന്നത്. ഈ വായ്പയ്ക്ക് നെല്ല് സംഭരണത്തിന്റെ നോഡൽ ഏജൻസിയായ സപ്ലൈകോ ഗ്യാരന്റി നിൽക്കുകയും തുകയും പലിശയും അടച്ചുതീർക്കുകയും ചെയ്യുന്നു. കിലോയ്ക്ക് 20.40 രൂപയാണ് കേന്ദ്രം നിശ്ചയിച്ചിരിക്കുന്ന വില. എന്നാൽ, കേരള സർക്കാർ 7.80 രൂപ സംസ്ഥാന പ്രോത്സാഹന ബോണസ് കൂടി ഇതിനൊപ്പംചേർത്ത് 28.20 രൂപ ഒരു കിലോ നെല്ലിന് നൽകുന്നു. രാജ്യത്തെ ഏറ്റവും ഉയർന്ന വിലയാണിത്. ഇക്കാര്യങ്ങളൊക്കെ മറച്ചുവച്ചുകൊണ്ടാണ് പിആർഎസ് വായ്പ ഒരു കർഷകദ്രോഹമായി ചിത്രീകരിക്കുന്നത്.
പിആർഎസ് വായ്പ 1997 ൽ വി എസ് അച്യുതാനന്ദൻ സർക്കാർ ആലപ്പുഴ, കോട്ടയം തൃശൂർ പാലക്കാട് എന്നീ നാല് ജില്ലകളിൽ സഹകരണ ബാങ്കുകളുടെ സഹകരണത്തോടുകൂടിയാണ് നടപ്പിലാക്കിയത്. പിന്നീട് ഡയറക്ട് ബെനിഫിറ്റ് ട്രാൻസ്ഫർ വന്നപ്പോൾ മാത്രമാണ് വാണിജ്യ ബാങ്കുകൾ ഇതിന്റെ ഭാഗമാകുന്നത്. കേരള സർക്കാർ മുൻകൈയെടുക്കുന്നത് കൊണ്ട് മാത്രമാണ് വാണിജ്യ ബാങ്കുകൾ ഇപ്പോഴും പദ്ധതിയിൽ സഹകരിക്കുന്നത്. മറ്റ് സംസ്ഥാനങ്ങളിൽ ഒന്നും ഇത്തരം പദ്ധതി നിലവിലില്ല.
രാജ്യത്തെ സ്ഥിതിയെന്ത്
ദേശീയ ക്രൈം റെക്കോഡ്സ് ബ്യൂറോയുടെ കണക്കുപ്രകാരം 1995നും 2024നും ഇടയിൽ രാജ്യത്ത് 2,96,438 കർഷകരാണ് ആത്മഹത്യ ചെയ്തത്. ഇതിൽ 60,750 പേർ മഹാരാഷ്ട്രയിൽനിന്നായിരുന്നു. കർഷകവിരുദ്ധവും കുത്തകാനുകൂലവുമായ നിയമങ്ങൾ, ബാങ്കുകളുടെയും ധനസ്ഥാപനങ്ങളുടെയും കണ്ണിൽച്ചോരയില്ലാത്ത വ്യവസ്ഥകൾ, സർക്കാരുകളുടെ നിസ്സംഗത ഇവയെല്ലാമാണ് ഇതിന്റെ കാരണങ്ങളെന്ന് വിദഗ്ധർ വിലയിരുത്തുന്നു. 1990കളിൽ ആരംഭിച്ച ഉദാരവൽക്കരണനയങ്ങൾ ബാങ്കിങ്‌ മേഖലയിലും ജനവിരുദ്ധമായ നിരവധി പരിഷ്കാരങ്ങൾ കൊണ്ടുവരികയുണ്ടായി.
വട്ടിപ്പലിശക്കാരുടെയും കൊള്ളപ്പലിശക്കാരുടെയും ഇരകളായി കടത്തിൽ ജനിച്ച് ജീവിച്ചു മരിച്ച ഇന്ത്യൻ കർഷകനെ ഒരു പരിധിവരെ രക്ഷപ്പെടുത്തിയത് ബാങ്ക് ദേശസാൽക്കരണം അടക്കമുള്ള ഇടതുപക്ഷ പരിഷ്‌കാരങ്ങളായിരുന്നു. ധാരാളമായി ഗ്രാമീണശാഖകൾ അനുവദിച്ചുകൊണ്ടും കർഷകർ അടക്കമുള്ള സാധാരണക്കാരെ സഹായിക്കുംവിധമുള്ള വായ്പാനയങ്ങൾ രൂപപ്പെടുത്തിക്കൊണ്ടും ബാങ്കുകൾ മുന്നോട്ടുപോയി. ഉദാരവൽക്കരണനയങ്ങളുടെ ഭാഗമായി ഇതിൽനിന്ന് വ്യതിചലിച്ചുകൊണ്ട് സമ്പന്നർക്കും വൻകിടക്കാർക്കും അനുകൂലമായ നയങ്ങൾ രൂപപ്പെടുത്തി. 2002ലെ സർഫാസി ആക്ട്, കിട്ടാക്കുടിശ്ശിക പിരിച്ചെടുക്കാൻ കരാർ സംഘങ്ങളെ ഏർപ്പെടുത്തൽ, ഗ്രാമീണശാഖകൾ അടച്ചുപൂട്ടൽ, സിബിൽ സ്കോർ സമ്പ്രദായം എന്നിവയെല്ലാം ഇതിന്റെ ഭാഗമായി വന്നിട്ടുള്ളതാണ്. വൻകിട മുതലാളിമാർ കോടാനുകോടികൾ അപഹരിച്ചുകൊണ്ട് രാജ്യംവിട്ട് സ്വൈരവിഹാരം നടത്തുമ്പോൾ ചെറുകിട, കാർഷിക വായ്പകൾപോലും നിഷേധിക്കപ്പെട്ട് കർഷകർ ആത്മഹത്യ ചെയ്യേണ്ട സാഹചര്യം കോൺഗ്രസും ബിജെപിയും പിന്തുടരുന്ന ജനവിരുദ്ധനയങ്ങളുടെ അനിവാര്യഫലമാണ്.
യുഡിഎഫ് ദുരിതകാലം കേരളം മറന്നോ
കേരളത്തിലും യുഡിഎഫ് ഭരണകാലത്ത് സ്ഥിതി വ്യത്യസ്തമായിരുന്നില്ല. 2001 മുതൽ 2006 വരെയുള്ള യുഡിഎഫ് ഭരണകാലത്ത് നിരവധി കർഷകർ ആത്മഹത്യ ചെയ്തു. കാർഷികമേഖലയായ വയനാടും പാലക്കാടുമാണ് ഇതിന്റെ ദുരന്തത്തിന് ഏറ്റവും കൂടുതൽ ഇരയായത്. 2006ൽ അധികാരത്തിൽ വന്ന വി എസ് അച്യുതാനന്ദൻ സർക്കാർ ആത്മഹത്യ ചെയ്ത കർഷകരുടെ മുഴുവൻ കടങ്ങളും എഴുതിത്തള്ളി. കാർഷിക കടാശ്വാസ കമീഷൻ രൂപീകരിച്ചു.
സംസ്ഥാന പ്രോത്സാഹന ബോണസ് ഉൾപ്പെടെ ഒരു കിലോ നെല്ലിന് രാജ്യത്ത് ഏറ്റവും ഉയർന്ന വില നൽകുന്ന കാര്യം മുകളിൽ സൂചിപ്പിച്ചല്ലോ. ഇതിനു പുറമെ സുസ്ഥിര നെൽക്കൃഷി വികസനപദ്ധതി പ്രകാരം ഹെക്ടറിന് 5500 രൂപ, തരിശുനില കൃഷിക്ക്‌ ഹെക്ടറിന് കർഷകന് 35,000 രൂപ, ഉടമയ്ക്ക് 5000 രൂപ, ഹെക്ടറിന് കുമ്മായത്തിന് 5400ഉം സൂക്ഷ്മ മൂലകങ്ങൾക്ക് 500 രൂപ വീതവും പാഡി റോയൽറ്റിയായി ഉടമയ്ക്ക് ഹെക്ടറിന് 3000 രൂപ, ഉൽപ്പാദന ബോണസായി ഹെക്ടറിന് 1000 രൂപ എന്നിവ നൽകുന്നു. ഇതിനു പുറമെയാണ് രാസവളത്തിന് 50 ശതമാനം സബ്സിഡി. വിവിധ തദ്ദേശഭരണ സ്ഥാപനങ്ങളിൽ വിത്തുവിതരണത്തിന് 100 ശതമാനവും രാസവളത്തിന് 50 ശതമാനവും സബ്സിഡി നൽകുന്നു. സ്ഥിരകൃഷിക്ക്‌ കൂലിച്ചെലവായി ഹെക്ടറിന് 25,000 രൂപ നൽകുന്നു. ഇപ്രകാരമെല്ലാം കർഷകനെ ചേർത്തുനിർത്തുന്ന സമീപനമാണ് എൽഡിഎഫ് സർക്കാർ സ്വീകരിച്ചുവരുന്നത്.
കള്ളപ്രചാരണങ്ങൾ തള്ളിക്കളയുക
ജനക്ഷേമപ്രവർത്തനങ്ങൾ നടപ്പാക്കുന്നതിലും ജനങ്ങളുടെ ജീവിതനിലവാരം ഉറപ്പുവരുത്തുന്നതിലും രാജ്യത്ത് പ്രഥമസ്ഥാനത്ത് കേരളമാണെന്നത് തർക്കമില്ലാത്ത സംഗതിയാണ്. നിതി ആയോഗ് അടക്കമുള്ള കേന്ദ്രസ്ഥാപനങ്ങൾതന്നെ ഇക്കാര്യം പലയാവർത്തി പ്രഖ്യാപിച്ചിട്ടുള്ളതാണ്. കർഷകരോടുള്ള സമീപനത്തിലും ഈ മാതൃകതന്നെയാണ് സംസ്ഥാന സർക്കാർ പിന്തുടരുന്നത്. സംസ്ഥാന സർക്കാരിനെ സാമ്പത്തികമായി ഞെരുക്കാനും ജനക്ഷേമപ്രവർത്തനങ്ങളെ ശ്വാസംമുട്ടിക്കാനുമുള്ള നടപടികളുമായി കേന്ദ്ര സർക്കാർ മുന്നോട്ടുപോകുന്നത് ചെറിയ പ്രയാസമല്ല സൃഷ്ടിച്ചിട്ടുള്ളത്. ഇതിനെ മറികടക്കുന്നതിന് കേരളത്തിന്റെ വികാരം രാജ്യതലസ്ഥാനത്ത് ഉൾപ്പെടെ പ്രകടിപ്പിക്കുന്ന വലിയ ജനമുന്നേറ്റത്തിന് വരുംനാളുകൾ സാക്ഷ്യംവഹിക്കും. അസത്യങ്ങൾ പ്രചരിപ്പിച്ചുകൊണ്ട് ജനപക്ഷ സർക്കാരിനെ താറടിക്കാനുള്ള ശ്രമങ്ങൾ വിജയിക്കുകയില്ല. കുത്തകകൾക്കും വൻകിടക്കാർക്കും അനുകൂലമായ ബാങ്കിങ്‌ ഉൾപ്പെടെയുള്ള സാമ്പത്തികനയങ്ങൾ ആവിഷ്കരിക്കുകയും നടപ്പാക്കുകയും ചെയ്ത ബിജെപിയുടെയും കോൺഗ്രസിന്റെയും കർഷകപ്രേമവും മുതലക്കണ്ണീരും കേരള ജനത തിരിച്ചറിയാതെ പോകുകയില്ല.
