ന്യൂഡൽഹി: കോൺഗ്രസ് പ്രവർത്തക സമിതി യോഗം ഇന്ന് ചേരും. ഇന്ന് വൈകീട്ട് 3.30ന് വെർച്വൽ മോഡിലാണ് പ്രവർത്തക സമിതി യോഗം ചേരുക. കോൺഗ്രസ് അധ്യക്ഷനെ തിരഞ്ഞെടുക്കുന്നതിനുള്ള അന്തിമ ഷെഡ്യൂൾ യോഗത്തിൽ ചർച്ച ചെയ്യുമെന്നാണ് സൂചന. മുതിർന്ന കോൺഗ്രസ് നേതാവ് ഗുലാം നബി ആസാദ് വെള്ളിയാഴ്ച കോൺഗ്രസിൽ നിന്ന് രാജിവച്ച പശ്ചാത്തലത്തിലും പാർട്ടി അധ്യക്ഷ സോണിയാ ഗാന്ധിക്ക് അദ്ദേഹം അയച്ച കത്തിൽ രാഹുൽ ഗാന്ധി “പാർട്ടിയുടെ മുഴുവൻ കൂടിയാലോചനാ സംവിധാനവും തകർത്തതിന്” ആഞ്ഞടിച്ച പശ്ചാത്തലത്തിൽ കൂടിയാണ് ഈ നടപടി. ഗുലാം നബി ആസാദിൻ്റെ രാജി, പാർട്ടി അധ്യക്ഷനെ തിരഞ്ഞെടുക്കുന്നതിനുള്ള അന്തിമ ഷെഡ്യൂൾ, പാർട്ടിയുടെ മറ്റ് ആഭ്യന്തര പ്രശ്നങ്ങൾ എന്നിവയെക്കുറിച്ചുള്ള ചർച്ചകൾക്ക് കോൺഗ്രസ് പ്രവർത്തക സമിതിയുടെ യോഗം സാക്ഷ്യം വഹിച്ചേക്കും. കോൺഗ്രസ് അധ്യക്ഷ സോണിയാ ഗാന്ധിക്ക് കത്ത് നൽകിയതിന് പിന്നാലെ ആനന്ദ് ശർമ്മയും ഗുലാം നബി ആസാദും ശനിയാഴ്ച ഒരു മണിക്കൂറിലധികം ഫോണിൽ സംസാരിച്ചതായും വൃത്തങ്ങൾ പറയുന്നു.
ബി.ജെ.പി സർക്കാരിൻ്റെ ദുർഭരണം ഏറ്റെടുക്കാൻ പാർട്ടി ഒരുങ്ങുന്നതിനിടെയാണ് ഗുലാം നബി ആസാദ് കോൺഗ്രസ് വിട്ടതെന്ന് കോൺഗ്രസ് നേതാവും രാജസ്ഥാൻ ഉപമുഖ്യമന്ത്രിയുമായ സച്ചിൻ പൈലറ്റ് നേരത്തെ പറഞ്ഞിരുന്നു. ഈ വർഷം ഓഗസ്റ്റ് 21 നും സെപ്റ്റംബർ 20 നും ഇടയിൽ പുതിയ പാർട്ടി അധ്യക്ഷനെ തിരഞ്ഞെടുക്കുമെന്ന് കോൺഗ്രസ് കഴിഞ്ഞ വർഷം ഒക്ടോബറിൽ പ്രഖ്യാപിച്ചിരുന്നു. സെപ്തംബർ ഏഴിന് ആരംഭിക്കുന്ന കന്യാകുമാരി മുതൽ കാശ്മീർ വരെയുള്ള ‘ഭാരത് ജോഡോ യാത്ര’ കേന്ദ്രീകരിച്ചും ചില സംസ്ഥാന യൂണിറ്റുകൾ ഔപചാരിക നടപടികൾ പൂർത്തീകരിക്കാത്തതിലും കോൺഗ്രസ് അധ്യക്ഷ തിരഞ്ഞെടുപ്പ് ഏതാനും ആഴ്ചകൾ വൈകാൻ സാധ്യതയുണ്ടെന്ന് വൃത്തങ്ങൾ അറിയിച്ചു. നിലവിൽ സോണിയാ ഗാന്ധി മെഡിക്കൽ ചെക്കപ്പിനായി വിദേശത്താണ്. രാഹുൽ ഗാന്ധിയും പ്രിയങ്ക ഗാന്ധി സോണിയക്ക് ഒപ്പമുള്ളതിനാൽ ഇരുവരും വെർച്വലായി കോൺഗ്രസ് പ്രവർത്തക സമിതി യോഗത്തിൽ ചേരും.
