കുട്ടികൾക്കെതിരായ സൈബർ കുറ്റകൃത്യങ്ങൾ; മൊബൈൽ ആപ്പ് തയാറാക്കാനൊരുങ്ങി സർക്കാർ

സംസ്ഥാനത്ത് കുട്ടികൾക്കെതിരായ സൈബർ കുറ്റകൃത്യങ്ങൾ തടയാൻ മൊബൈൽ ആപ്പ് ഉൾപ്പടെയുള്ള വിവിധ നടപടികൾ സ്വീകരിക്കുമെന്ന് മുഖ്യമന്ത്രി പിണറായി വിജയൻ നിയമസഭയിൽ പറഞ്ഞു. കുട്ടികൾക്കെതിരായ സൈബർ കുറ്റകൃത്യങ്ങൾ വർധിച്ചുവരുന്നതിനെ കുറിച്ചും പ്രശ്‌നം നേരിടാൻ സർക്കാരും ഏജൻസികളും കൈക്കൊണ്ട നടപടികളെക്കുറിച്ചുള്ള ചോദ്യങ്ങൾക്ക് മറുപടി പറയുകയായിരുന്നു അദ്ദേഹം. കൊവിഡ് 19 മഹാമാരിയുടെ പശ്ചാത്തലത്തിൽ വിദ്യാഭ്യാസ സ്ഥാപനങ്ങൾ അടച്ചുപൂട്ടിയ സാഹചര്യത്തിലാണ് ഡിജിറ്റൽ ഉപകരണങ്ങളും ഇന്റർനെറ്റും ഉപയോഗിച്ച് ഓൺലൈൻ ക്ലാസുകൾ നടത്തിയത്. അതിനെത്തുടർന്നാണ് കുട്ടികളുടെ മൊബൈൽ ഫോണും ഇന്റർനെറ്റും ഉപയോഗം വർധിച്ചത്. അമിത ഉപയോഗം സൈബർ കുറ്റകൃത്യങ്ങളുടെ കെണികളിലേക്ക് കുട്ടികളെ നയിക്കുമെന്നും അദ്ദേഹം കൂട്ടിച്ചേർത്തു. അതിനാൽ കുട്ടികൾക്കെതിരായ സൈബർ ആക്രമണങ്ങളും കുറ്റകൃത്യങ്ങളും തടയാൻ സംസ്ഥാന വനിതാ ശിശുവികസന വകുപ്പിന്റെ സഹായത്തോടെ മൊബൈൽ ആപ്പ് പുറത്തിറക്കുന്നുണ്ടെന്നും അദ്ദേഹം പറഞ്ഞു. കുട്ടികളുടെ അനധികൃത ഫോട്ടോകൾ അപ്‌ലോഡ് ചെയ്യുന്നതും ഡൗൺലോഡ് ചെയ്യുന്നതും സംബന്ധിച്ച് സംസ്ഥാന പോലീസിന്റെ സൈബർഡോം വിഭാഗം ജാഗ്രതാ നടപടികൾ സ്വീകരിച്ചുവരികയാണെന്നും വീട്ടിൽ കുട്ടികളുടെ സാന്നിധ്യത്തിൽ മൊബൈൽ ഫോൺ ഉപയോഗിക്കുമ്പോൾ മാതാപിതാക്കൾ ജാഗ്രത പാലിക്കണമെന്നും അദ്ദേഹം മുന്നറിയിപ്പ് നൽകി. ഇത്തരം വിഷയങ്ങൾ എങ്ങനെ കൈകാര്യം ചെയ്യണമെന്ന് രക്ഷിതാക്കളിലും അധ്യാപകരിലും അവബോധം സൃഷ്ടിക്കേണ്ടതിന്റെ ആവശ്യകതയും മുഖ്യമന്ത്രി വ്യക്തമാക്കി.