ഹരാരെ: ശുഭ്മാൻ ഗില്ലിൻ്റെ സെഞ്ച്വറി മികവിൽ സിംബാബ്‌വെയ്‌ക്കെതിരായ മൂന്നാമത്തെയും അവസാനത്തെയും ഏകദിനത്തിൽ ഇന്ത്യ മികച്ച സ്കോറിലേക്ക്. ഏകദിനത്തിലെ തൻ്റെ ആദ്യ സെഞ്ച്വറിയാണ് ഗിൽ നേടിയത്. ടോസ് നേടി ബാറ്റിംഗ് തിരഞ്ഞെടുത്ത ഇന്ത്യക്കായി ക്യാപ്റ്റൻ കെ എൽ രാഹുലും ശിഖർ ധവാനും ചേർന്ന് മികച്ച തുടക്കം നൽകി. സ്കോർ 15 ഓവറിൽ 63-ൽ നിൽക്കെ ക്യാപ്റ്റൻ കെ എൽ രാഹുൽ പുറത്തായി. പിന്നാലെയാണ് ഗിൽ ക്രീസിലിറങ്ങിയത്. രാഹുലിന് പിന്നാലെ ധവാനും മടങ്ങിയതോടെ ഇന്ത്യ പരുങ്ങലിലായി. എന്നാൽ നാലാമനായി എത്തിയ ഇഷാൻ കിഷനെ കൂട്ടുപിടിച്ച് ഗിൽ സ്കോർ പടുത്തുയർത്തി. പക്വതയോടെ ബാറ്റ് ചെയ്ത കിഷൻ അർധസെഞ്ചുറിയും നേടി.
