കേന്ദ്രം സംസ്ഥാന പദ്ധതികൾക്ക് അവകാശവാദം ഉന്നയിക്കുമോ: കോടിയേരി ബാലകൃഷ്ണൻ

സാധാരണഗതിയിൽ കേരളത്തിൽ അധികം വരുന്ന ആളല്ല കേന്ദ്ര വിദേശകാര്യ മന്ത്രി എസ്‌ ജയശങ്കർ. ഇപ്പോൾ കേരളത്തിൽ വരികയും സംസ്ഥാനത്തിന്റെ ചില വികസനപദ്ധതികൾ കാണുകയും ചെയ്‌തു. വികസനപദ്ധതികൾ കാണുന്നത്‌ നല്ലതാണ്‌. എന്നാൽ അതിന്റെ പിന്നിൽ ഒരു ദുരുദ്ദേശമുണ്ടെന്നും സിപിഐ(എം) സംസ്ഥാന സെക്രട്ടറി കോടിയേരി ബാലകൃഷ്ണൻ വാർത്താസമ്മേളനത്തിൽ പറഞ്ഞു. കേന്ദ്രസർക്കാർ പദ്ധതികൾ പ്രഖ്യാപിക്കുന്നുണ്ടെങ്കിൽ അതൊന്നും കേരളത്തിൽ നടപ്പാക്കുന്നില്ല. നേമം ടെർമിനൽ നടപ്പാക്കാനും കേന്ദ്രം തയ്യാറാകുന്നില്ല. കേരളത്തിന്‌ അനുവദിച്ച പാലക്കാട്‌ കോച്ച്‌ ഫാക്‌ടറിയും മുന്നോട്ടുപോയില്ല. കേന്ദ്ര റെയിൽവേ വകുപ്പുതന്നെ കേരളത്തിൽ പ്രഖ്യാപിച്ചതാണ്‌ റെയിൽവേ മെഡിക്കൽ കോളേജ്‌. അത്‌ കേന്ദ്രസർക്കാരിന് ഇപ്പോൾ ഓർമ്മപോലുമില്ല. റെയിൽവേ പദ്ധതികളിൽ തലശ്ശേരി – മൈസൂർ റെയിൽവേ, നഞ്ചങ്കോട്‌ – നിലമ്പൂർ റെയിൽവേ എന്നിവ നടപ്പാക്കാമെന്ന്‌ വാഗ്‌ദാനം ചെയ്‌തെങ്കിലും ഒന്നും നടപ്പാക്കിയില്ല. ഇതുപോലെ നടപ്പിലാകാത്ത നിരവധി വാഗ്‌ദാനങ്ങൾ നമുക്ക് മുന്നിലുണ്ട്. സംസ്ഥാന സർക്കാർ കൂടി ചേർന്ന്‌ നടപ്പാക്കുന്ന പദ്ധതിയാണ്‌ ദേശീയപാത വികസനം. തലപ്പാടി മുതൽ കളിയിക്കാവിള വരെയുള്ള റോഡ്‌ വികസനം രണ്ട്‌ വർഷംകൊണ്ട്‌ പൂർത്തിയാകും. പാർലമെന്റ്‌ മണ്ഡലത്തിൽ യുഡിഎഫ്‌ എംപിമാർ അവരാണ്‌ ഈ പദ്ധതി തുടങ്ങിയതെന്ന്‌ പറഞ്ഞുകൊണ്ടിരിക്കുകയാണ്‌. ബിജെപിയും അവകാശവാദമുന്നയിച്ച്‌ വന്നിരിക്കുകയാണ്‌. ഫലത്തിൽ കേന്ദ്രമന്ത്രിമാരുടെ സന്ദർശനം സദുദ്ദേശപരമല്ല.