അടിയന്തിര പ്രമേയ നോട്ടീസിന്റെ കാരണം കോൺഗ്രസിന്റെ വിഷയ ദാരിദ്ര്യം.

കണ്ണൂര്‍ ചാവശ്ശേരിയില്‍ സ്‌ഫോടനത്തില്‍ 2 ആസാം സ്വദേശികള്‍ മരിച്ച സംഭവം ചര്‍ച്ച ചെയ്യണമെന്നാവശ്യപ്പെട്ട പ്രതിപക്ഷത്തിന്റെ അടിയന്തിര പ്രമേയ നോട്ടീസ് വിഷയദാരിദ്ര്യം കാരണം പൊട്ടിപുറപ്പെട്ടതെന്നു മുഖ്യമന്ത്രി. കേരളത്തിലെ ക്രമസമാധാനം തകർക്കാൻ ആർക്കും ആവില്ലെന്നും മുഖ്യമന്ത്രി കൂട്ടിച്ചേർത്തു. ഇപ്പോള്‍ ഇവിടെ പരാമര്‍ശിക്കപ്പെട്ട ആക്രിസാധനങ്ങള്‍ ശേഖരിക്കുന്നവര്‍ കണ്ടെത്തിയ ഉപേക്ഷിക്കപ്പെട്ട വസ്തുക്കള്‍ ശേഖരിച്ച് സൂക്ഷിച്ചപ്പോള്‍ സ്ഫോടനമുണ്ടാവുകയും രണ്ടു പേര്‍ മരണമടയുകയും ചെയ്തത് തികച്ചും ദൗര്‍ഭാഗ്യകരമായ സംഭവമാണ്. ഇത്തരം ശക്തികള്‍ പരസ്പരം പകപോക്കലിനായി സംഭരിച്ചതും ഉപേക്ഷിച്ചതുമായ ആയുധങ്ങളും മറ്റും എവിടെനിന്ന് ലഭ്യമായി, എന്താണ് അതിന്റെ ഉറവിടം എന്നിങ്ങനെയുള്ള വിശദാംശങ്ങള്‍ കണ്ടെത്താന്‍ ജാഗ്രതയോടെയുള്ള അന്വേഷണം പോലീസ് നടത്തുകയും കുറ്റക്കാരെ കണ്ടെത്തി കര്‍ശന നടപടി സ്വീകരിക്കുകയും ചെയ്യും. കണ്ണൂര്‍ ജില്ലയില്‍ സമാധാനത്തിന് ഭംഗമുണ്ടാക്കാന്‍ ശ്രമിക്കുന്നത് സി പി ഐ എമ്മല്ല. ഏറ്റവും കൂടുതല്‍ ആക്രമണങ്ങള്‍ നടത്തുന്നത് ആര്‍ എസ് എസ്സ്, എസ് ഡി പി ഐ, പോപ്പുലര്‍ ഫ്രണ്ട് എന്നിവരാണ്. എന്നാൽ ഇവരെക്കുറിച്ചൊന്നും നോട്ടീസിൽ ഒരിടത്തും പരാമർശിച്ചിട്ടില്ല. അന്ധമായ എൽ ഡി എഫ് വിരോധം മനസ്സിൽ സൂക്ഷിച്ചുകൊണ്ടു കോൺഗ്രസ് കേരളത്തിൽ നടത്തുന്ന ഓരോ ശ്രമങ്ങൾക്കിടയിലും അവർ മറ്റു സംസ്ഥാനങ്ങളിൽ നേരിടുന്ന പരിതാപകരമായ അവസ്ഥ കൂടെ ഓർക്കണമെന്നും മുഖ്യമന്ത്രി ചൂണ്ടിക്കാട്ടി.