മലയാളത്തിൻ്റെ യുവതാരം ടൊവിനോ തോമസിനെ നായകനാക്കി നവാഗതനായ ജിതിൻ ലാൽ ഒരുക്കുന്ന ചിത്രം അജയൻ്റെ രണ്ടാം മോഷണത്തിൻ്റെ പോസ്റ്റർ പുറത്ത്, നിഗൂഢതകൾ ഒളിപ്പിച്ചുകൊണ്ടുള്ള പോസ്റ്റർ ഇതിനോടകം ശ്രദ്ധ നേടി കഴിഞ്ഞു. ‘പുതുവത്സരാശംസകൾ ജനങ്ങളേ… ഈ പുതുവർഷത്തിൽ ഞങ്ങൾക്ക് വലിയൊരു കാര്യം നിങ്ങളെ കാണിക്കാനുണ്ട്… കൂടുതൽ നിഗൂഢതകൾ വെളിപ്പെടാൻ കാത്തിരിക്കുക’, എന്ന് കുറിച്ചാണ് ടൊവിനോ പോസ്റ്റർ ഫേസ്ബുക്കിലൂടെ പങ്കുവെച്ചത്.
ടൊവിനോ തോമസിനെ നായകനാക്കി നവാഗതനായ ജിതിൻ ലാൽ ഒരുക്കുന്ന ചിത്രമാണ് ‘അജയന്റെ രണ്ടാം മോഷണം’. ടൊവിനോ ചിത്രത്തിൽ ട്രിപ്പിൾ വേഷത്തിലാണ് എത്തുന്നത്. പൂർണമായും ത്രിഡിയിലാണ് ചിത്രം ഒരുങ്ങുന്നത്. ആക്ഷനും അഡ്വഞ്ചറിനുമാണ് അജയന്റെ രണ്ടാം മോഷണം പ്രാധാന്യം നൽകിയിരിക്കുന്നത്. യുജിഎം പ്രൊഡക്ഷൻസ്, മാജിക് ഫ്രയിംസ് എന്നീ ബാനറുകളിൽ ഡോ.സക്കറിയ തോമസ്, ലിസ്റ്റിൻ സ്റ്റീഫൻ എന്നിവർ ചേർന്നാണ് ചിത്രം നിർമ്മിക്കുന്നത്.
പല കാലഘട്ടങ്ങളിലൂടെ മുന്നേറുന്ന ഒരു അഡ്വഞ്ചർ സാഗയാണ് ചിത്രമെന്നാണ് അണിയറക്കാർ ചിത്രത്തിനെ വിശേഷിപ്പിക്കുന്നത്. ഐശ്വര്യ രാജേഷ്, കൃതി ഷെട്ടി, സുരഭി ലക്ഷ്മി എന്നിവരാണ് നായികമാർ.ബേസിൽ ജോസഫ്, ജഗദീഷ്, ഹരീഷ് ഉത്തമൻ, ഹരീഷ് പേരടി, ഐശ്വര്യ രാജേഷ്, സുരഭി ലക്ഷ്മി, റോഹിണി എന്നിവരാണ് ചിത്രത്തിലെത്തുന്ന മറ്റ് താരങ്ങൾ. ഒരു പാൻ ഇന്ത്യൻ ചിത്രമായാണ് അജയന്റെ രണ്ടാം മോഷണം ഒരുങ്ങുന്നത്. തമിഴിലെ ഹിറ്റ് മ്യൂസിക് ഡയറക്ടർ ദീപു നൈനാൻ തോമസാണ് സംഗീത സംവിധാനം.
https://www.facebook.com/ActorTovinoThomas/posts/717680156386091
