മക്ബൂൽ സൽമാനെ നായകനാക്കി സൂരജ് സുകുമാർ നായർ സംവിധാനം ചെയ്യുന്ന ‘റൂട്ട് മാപ്പ്’ ചിത്രത്തിന്റെ ട്രെയിലർ പുറത്ത് വിട്ടു. സൈന മൂവീസിലൂടെയാണ് ട്രെയിലർ റിലീസ് ചെയ്തത്. മഹാമാരി തീർത്ത ഭീതിയും, ലോക്ഡൗണും പശ്ചാത്തലമാക്കിയാണ് റൂട്ട് മാപ്പ് എന്ന ചിത്രം ഒരുക്കിയിരിക്കുന്നത്.
കോവിഡ് നിയന്ത്രണങ്ങൾ പാലിച്ച് തിരുവനന്തപുരത്തും ചെന്നൈയിലുമായിട്ടാണ് റൂട്ട് മാപ്പിന്റെ ഷൂട്ടിങ് പൂർത്തിയാക്കിയത്. പത്മശ്രീ മീഡിയ ഹൗസിന്റെ ബാനറിൽ ശബരി നാഥ് നിർമ്മിക്കുന്ന ഈ ചിത്രത്തിൽ ആനന്ദ് മന്മഥൻ, ഷാജു ശ്രീധർ, നോബി, ഗോപു കിരൺ, സിൻസീർ, ശ്രുതി റോഷൻ, നാരായണൻ കുട്ടി, ജോസ്, സജീർ സുബൈർ, ലിൻഡ, അപർണ, ഭദ്ര തുടങ്ങിയവരാണ് ചിത്രത്തിൽ വേഷമിടുന്നത്.
കോവിഡ് കാലത്ത് രണ്ടു ഫ്‌ലാറ്റുകളിലായി നടക്കുന്ന ചില സംഭവങ്ങൾ പ്രമേയമാക്കി അവതരിപ്പിക്കുന്ന ഈ ചിത്രത്തിന്റെ തിരക്കഥയും സംഭാഷണവും അരുൺ കായംകുളം ആണ് നിർവഹിക്കുന്നത്. ആഷിഖ് ബാബു ഛായാഗ്രഹണം നിർവഹിക്കുന്നു. പ്രശാന്ത് കർമ്മ, അശ്വിൻ വർമ്മ എന്നിവർ ചേർന്ന് സംഗീതം പകരുന്നു. എഡിറ്റർ- കൈലാഷ് എസ്. ഭവൻ.
