തരുൺ മൂർത്തിയുടെ സംവിധാനത്തിലൊരുങ്ങിയ ഹിറ്റ് ചിത്രം സൗദി വെള്ളക്ക തീയേറ്ററിൽ വിജയം തീർത്തതിന് പിന്നാലെ ഒടിടിയിലേയ്ക്കും എത്തുന്നു. തരുൺ തന്നെയാണ് ചിത്രത്തിന്റെ ഒ.ടി.ടി റിലീസ് വിവരങ്ങൾ പ്രേക്ഷകരെ അറിയിച്ചത്. അടുത്ത വർഷം ജനുവരി ആറിനാണ് ചിത്രം സോണി ലിവിലൂടെ റിലീസ് ചെയ്യുക.
ഡിസംബർ രണ്ടിനാണ് തരുൺ മൂർത്തിയുടെ സംവിധാനത്തിലൊരുങ്ങിയ രണ്ടാമത്തെ ചിത്രമായ സൗദി വെള്ളക്ക തിയേറ്ററുകളിലെത്തിയത്. ദേവി വർമ കേന്ദ്രകഥാപാത്രമായ ചിത്രം ഒരു വെള്ളക്ക കേസിനെ ചുറ്റിപ്പറ്റിയാണ് നടക്കുന്നത്. വീട്ടുകാരെ ഉപേക്ഷിച്ച് വീട് വിട്ട് ഇറങ്ങാൻ പ്രേരിപ്പിച്ച വെള്ളക്ക കേസിന്റെ പുറകെ വർഷങ്ങളോളം അലയേണ്ടി വരുന്ന ഉമ്മയുടെ കഥയാണ് ചിത്രത്തിന്റെ പ്രമേയം.
ഒരു തുള്ളി കണ്ണുനീർ പോലും ഒഴുക്കാതെ ചിത്രം കണ്ട് തീർക്കാൻ കഴിയില്ലെന്നാണ് പ്രേക്ഷക പ്രതികരണങ്ങൾ. ലുക്മാൻ അവറാൻ, സിദ്ധാർഥ് ശിവ, ബിനു പപ്പു, സുജിത്ത് ശങ്കർ, ഗോകുലൻ, ശ്രിന്ദ, റിയ സെയ്റ, ധന്യ അനന്യ എന്നിവരാണ് മറ്റ് പ്രധാന കഥാപാത്രങ്ങളെ അവതരിപ്പിച്ചത്.ഉർവ്വശി തിയറ്റേഴ്സിന്റെ ബാനറിൽ സന്ദീപ് സേനൻ ആണ് ചിത്രത്തിന്റെ നിർമാണം
