ആരാധകർ അക്ഷമയോടെ കാത്തിരിക്കുന്ന ചിത്രമാണ് വാരിസ്. തമിഴ്‌നാട്ടിലെ പൊങ്കലിന് എത്തുന്ന ചിത്രത്തിലെ ഓരോ അപ്‌ഡേറ്റ്‌സും പ്രേക്ഷകർ ഇരുകൈയും നീട്ടിയാണ് സ്വീകരിക്കുന്നക്. നേരത്തെ പുറത്ത് വിട്ട രഞ്ജിതമേ ഗാനം സൃഷ്ടിച്ച ഓളം ചെറുതായിരുന്നില്ല. വിജയ് പാടിയ ഗാനത്തിന് മികച്ച പ്രതികരണമാണ് ലഭിച്ചത്. സോഷ്യൽമീഡിയ റീൽസുകളിലെല്ലാം ഗാനം നിറഞ്ഞ് നിന്നിരുന്നു.
ഇപ്പോൾ പുതിയ ഗാനവും അണിയറ പ്രവർത്തകർ പുറത്ത് വിട്ടിരിക്കുകയാണ്. നടൻ ചിമ്പുവാണ് വിജയ് ചിത്രത്തിന് വേണ്ടി ഗാനം ആലപിച്ചിരിക്കുന്നത്. ‘തീ ദളപതി’ എന്ന ഗാനം ലിറിക്കൽ വീഡിയോ ആയാണ് പുറത്തിറങ്ങിയിരിക്കുന്നത്. വിജയ്ക്കുള്ള ആദരം എന്ന നിലയിലാണ് ഗാനം പുറത്തിറക്കിയിരിക്കുന്നത്. ആരാധകരെ ആവേശം കൊള്ളിക്കുന്ന തരത്തിലുള്ള വരികളാണ് ഗാനത്തിന്റെ പ്രത്യേകത.
ചിമ്പു, നൃത്തസംവിധായകൻ സാൻഡി മാസ്റ്റർ, വിജയ് എന്നിവരാണ് ഗാനരംഗത്തിലെത്തുന്നത്. തമൻ ആണ് ഗാനത്തിന് ഈണമിട്ടിരിക്കുന്നത്. തെലുങ്കിലെ പ്രശസ്ത സംവിധായകൻ വംശി പൈഡിപ്പള്ളി ആദ്യമായി സംവിധാനം ചെയ്യുന്ന തമിഴ് ചിത്രമാണ് വാരിസ്. ശ്രീ വെങ്കടേശ്വര ക്രിയേഷൻസിന്റെ ബാനറിൽ ദിൽ രാജു ആണ് ചിത്രം നിർമിക്കുന്നത്.
