തമിഴ് നടൻ വിഷ്ണു വിശാൽ നായകനാകുന്ന പുതിയ ചിത്രം ‘ഗട്ട കുസ്തി’യുടെ തമിഴ്‌നാട്ടിലെ വിതരണം ഏറ്റെടുത്ത് നടൻ ഉദയനിധി സ്റ്റാലിൻ്റെ റെഡ് ജിയാന്റ് മൂവീസ്. മലയാളികളുടെ പ്രിയപ്പെട്ട താരം ഐശ്വര്യ ലക്ഷ്മിയാണ് ചിത്രത്തിൽ നായികയായി എത്തുന്നത്. മലയാളത്തിന് പുറമെ, തെന്നിന്ത്യയിലും ചുവടുറപ്പിക്കുകയാണ് താരം. ചെല്ല അയ്യാവുവാണ് ചിത്രം സംവിധാനം ചെയ്യുന്നത്. തെലുങ്കിൽ ‘മട്ടി കുസ്തി’ എന്ന പേരിലും ചിത്രം എത്തും.
ഗ്രാമീണ പശ്ചാത്തലത്തിൽ ഒരുക്കുന്ന ഒരു സ്പോർട്സ് ഡ്രാമയാണ് ചിത്രം. റിച്ചാർഡ് എം നാഥൻ ആണ് ചിത്രത്തിൻ്റെ ഛായാഗ്രാഹണം നിർവഹിക്കുന്നത്. ജസ്റ്റിൻ പ്രഭാകരൻ സംഗീത സംവിധാനം നിർവഹിക്കുന്ന ചിത്രം ഡിസംബർ രണ്ടിനാണ് തിയറ്ററുകളിലെത്തുന്നത്. വിഷ്ണു വിശാൽ നായകനായി ഏറ്റവും ഒടുവിൽ പ്രദർശനത്തിന് എത്തിയ ചിത്രം ‘എഫ്‌ഐആ’ർ ആണ്. മനു ആനന്ദ് ആണ് ചിത്രം സംവിധാനം ചെയ്തത്. മനു ആനന്ദിന്റേത് തന്നെയാണ് ചിത്രത്തിൻ്റെ തിരക്കഥയും.
മലയാളി താരം മഞ്ജിമ മോഹനും ചിത്രത്തിൽ ഒരു പ്രധാന കഥാപാത്രമായി എത്തിയിരുന്നു. വിവി സ്റ്റുഡിയോസാണ് ചിത്രം നിർമിച്ചിരിക്കുന്നത്. അരുൾ വിൻസെന്റാണ് ചിത്രത്തിൻ്റെ ഛായാഗ്രാഹണം നിർവഹിച്ചിക്കുന്നത്. അശ്വത് ആണ് ചിത്രത്തിൻ്റെ സംഗീത സംവിധായകൻ. ഐശ്വര്യ ലക്ഷ്മിയുടേതായി ഒടുവിൽ തീയേറ്ററിലെത്തിയ ചിത്രം കുമാരിയാണ്. മുത്തശ്ശിക്കഥ പ്രമേയമാകുന്ന ചിത്രം ഇന്ന് ഒടിടിയിലും പ്രദർശനത്തിന് എത്തിയിരുന്നു. നെറ്റ്ഫിളിക്‌സിലൂടെയാണ് ചിത്രം പ്രദർശനത്തിന് എത്തിയത്.
