വോൾക്കാനോ സിനിമാസിൻ്റെ ബാനറിൽ പ്രദീപ് നളന്ദയുടെ നിർമ്മാണത്തിൽ സുനിൽ പൊറ്റമ്മൽ തിരക്കഥയെഴുതി സംവിധാനം ചെയ്യുന്ന ‘പ്രതി നിരപരാധിയാണോ?’ തീയേറ്ററുകളിലേയ്ക്ക് എത്തുന്നു. ഇന്ദ്രൻസ്, ഹരീഷ് പേരടി, സുനിൽ സുഗത, ശ്രീജിത്ത് രവി, നീന കുറുപ്പ് എന്നിവർ കേന്ദ്രകഥാപാത്രങ്ങളാകുന്ന ചിത്രം നവംബർ 25നാണ് തീയേറ്ററുകളിലേയ്ക്ക് എത്തുന്നത്. സഹസംവിധായകനും കോസ്റ്റ്യൂം ഡിസൈനറുമായ സുനിലിൻ്റെ ആദ്യ സംവിധാന സംരംഭം കൂടിയാണ് ഈ ചിത്രം.
ചിത്രത്തിലെ ‘ഡമ്മാഡി… ഡമ്മാഡി…’ എന്നു തുടങ്ങുന്ന ഗാനം കഴിഞ്ഞ ദിവസമാണ് അണിയറ പ്രവർത്തകർ പുറത്ത് വിട്ടത്. ഗാനത്തിന് വലിയ സ്വീകാര്യതയാണ് ലഭിച്ചത്. പി. ടി. ബിനു എഴുതിയ വരികളുടെ സംഗീതസംവിധാനവും ആലാപനവും അരുൺ രാജ് ആണ്. പതിവു ഗാനശൈലിയിൽ നിന്നു വ്യത്യസ്തമായ രീതിയിലാണ് ഗാനം ചിട്ടപ്പെടുത്തിയതാണ് പ്രേക്ഷകരിൽ നിന്ന് ലഭിച്ച സ്വീകാര്യതയുടെ മറ്റൊരു കാരണം.
കലാഭവൻ ഷാജോൺ, നിഷ സാരംഗ്, തുടങ്ങിയവരുടെ ഫേസ്ബുക്ക് പേജിലൂടെയാണ് വീഡിയോ സോംഗ് റിലീസ് ചെയ്തത്. നിഥിൻ രാജ്, ബാലാജി ശർമ്മ, സുനിൽ സുഗത, അരിസ്റ്റോ സുരേഷ്, കണ്ണൻ പട്ടാമ്പി, റിഷിക്ക് ഷാജ്, ബാബു അടൂർ, ബാലൻ പാറയ്ക്കൽ, പ്രദീപ് ബാലൻ, കുളപ്പുള്ളി ലീല, പാർവതി, അനാമിക പ്രദീപ്, ആവണി തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. നിർമാതാവ് പ്രദീപ് നളന്ദയും ചിത്രത്തിൽ ശ്രദ്ധേയമായ കഥാപാത്രത്തെ അവതരിപ്പിക്കുന്നുണ്ട്.
